PacLII Home | Databases | WorldLII | Search | Feedback

Vanuatu Sessional Legislation

You are here:  PacLII >> Databases >> Vanuatu Sessional Legislation >> Konstitusin blong Ripablik blong Vanuatu

Database Search | Name Search | Noteup | Download | Help

  Download original PDF


Konstitusin blong Ripablik blong Vanuatu

REPABLIK BLONG VANUATU


KONSTITUSIN


BLONG
RIPABLIK
BLONG
VANUATU


(NIU HEBREDIS)


1980


FASTOK BLONG HEM


YUMI OL MAN NYUHEBREDIS.


YUMI STAP PRAOD from we yumi bin faet strong blong kam friman.


MO TINGTING BLONG YUMI STAP STRONG YET blong yumi lukaotgud long olgeta samting ya we yumi winim long faet ya.


YUMI STAP HOLEMTAET FASIN YA we yumi gat ol naranarafala kala mo ol naranarafala lanwis mo ol naranarafala kastom.


BE YUMI SAVEGUD we long fyuja bambae yumi evriwan i wokbaot long wan rod nomo.


NAO YUMI TALEMAOT WE NAOIA YUMI STANEMAP RIPABLIK BLONG NYUHEBRERIS, we tingting blong yumi man ples i wan nomo mo yumi ol friman. Kantri ya blong yumi i stanap long ol gudgudfala fasin blong ol bubu blong yumi bifo wetem fasin blong bilif long God mo ol fasin Kristin man.


MO BLONG STANEMAP RIPABLIK YA BLONG YUMI OLSEM, yumi olgeta man ples evriwan, yumi agri blong stap aninit long Konstitusin ya, blong hem i holemgud laef blong yumi.


JAPTA WAN


KANTRI YA MO PAOA BLONG RUL LONG HEM


RIPABLIK BLONG NYUHEBREDIS


1. Ripablik blong Nyuhebredis, hem i wan kantri we olgeta man ples blong hem i holem paoa blong gavman, nao gavman blong olgeta nomo i rul long hem.


KONSTITUSIN I STAMPA BLONG OL LOA


2. Konstitusin ya, hemia ol loa we i stampa blong ol narafala loa blong Nyuhebredis.


LANWIS BLONG RIPABLIK MO OL LANWIS BLONG WOK


3. (1) Lanwis blong Repablik blong Nyuhebredis, hemia Bislama. Trifala lanwis blong mekem ol wok long kantri ya, i gat Bislama mo Inglis mo Franis. Tufala big lanwis blong edukesen long kantri ya, i gat Inglis mo Franis.


(2) Ol netif lanwis blong Nyuhebredis oli haf blong ol gudgudfala samting blong bifo long kantri ya, mo gavman blong Ripablik bambae i lukaotgud long olgeta blong oli no lus. Sipos gavman ya i wantem mekem olsem, bambae hemi i save jusumaot wan long ol lanwis ya blong i jenisim Bislama, i kam lanwis blong Ripablik blong Nyuhebredis.


PAOA BLONG RULUM KANTRI, MO FASIN BLONG VOT, MO OL PATI BLONG POLITIK


4. (1) Long Nyuhebredis ol man ples bambae oli holem paoa blong rulum kantri, mo bambae oli stap jusumaot ol memba blong Palamen, mo oli stap givim paoa long olgeta blong oli rul.


(2) Sipos Palamen i no mekem loa blong blokem samfala man, olgeta man ples we oli gat eitin ya blong olgeta finis bambae oli gat raet blong vot. Bambae olgeta evriwan oli gat sem raet blong vot, mo taem oli vot bambae oli gat raet blong mekem long fasin ya we narafala man i no save tingting blong narafala man.


(3) Bambae ol man ples oli save statem ol pati blong politik, mo ol pati ya bambae oli save stanemap ol kandidet long taem blong eleksen. Bambae ol pati ya oli wok aninit long Konstitusin ya, mo bambae oli folem ol fasin ya we i letem ol man ples oli holem paoa blong gavman.


JAPTA TU


OL RAET WE OL MAN BAMBAE OLI GAT MO OL FASIN WE OL


MAN OLI MAS MEKEM


HAF NAMBA WAN


OL RAET WE OL MAN BAMBAE OLI GAT


OL RAET WE OL MAN BAMBAE OLI GAT MO OL SAMTING WE OL MAN BAMBAE OLI FRI BLONG MEKEM


5. (1) Gavman blong Ripablik blong Nyuhebredis i talemaot we i luksave finis, se sipos Palamen i no mekem sam spesel loa blong olgeta we oli no man ples, olgeta man evriwan bambae oli gat raet blong mekem ol samting ya, mo oli fri blong mekem olgeta.


(a) Olgeta man oli gat raet blong stap laef, i no gat man i gat raet blong kilim narafala man i ded.


(b) Olgeta man oli gat raet blong stap friman, i no gat man i gat raet blong fosem narafala man i stap aninit long han blong hem.


(c) Olgeta man oli gat raet blong stap gud, i no gat man i gat raet blong mekem narafala man i harem nogud long bodi blong hem, mo blong spolem bodi blong narafala man.


(d) Loa i stap blong lukaot long olgeta man mo i no gat man we i gat raet blong i ova long loa, nao i spolem narafala man.


(e) I no gat man i gat raet blong mekem i strong long narafala man olsem we man ya i anamol nomo mo i no gat man i gat raet blong fosem narafala man blong i wok blong hem.


(f) Olgeta man oli fri blong folem tingting blong olgeta blong mekem fasin we i stret mo fasin we i no stret, mo oli fri blong mekem wosip long fasin we oli wantem.


(g) Olgeta man oli fri blong talemaot tingting blong olgeta long olgeta samting blong laef blong kantri.


(h) Olgeta man oli fri blong kam wanples blong mekem miting, mo oli gat raet blong joen long ol grup olsem we oli wantem.


(i) Olgeta man oli fri blong go olbaot long Nyuhebredis, i no gat man i gat raet blong blokem narafala man blong i no wokbaot.


(j) Olgeta man oli save blokem haos blong olgeta mo graon blong olgeta i blong olgeta nomo, nao i no gat narafala man i gat raet blong go insaed. Olgeta man oli save luk long gavman blong i blokem narafala man i no kam tekemaot graon blong olgeta mo olting blong olgeta long fasin we i no stret.


(k) Ol kot bambae oli mekem sem mak long olgeta man, olsem we oli mekem long sam man finis, mo gavman bambae i mekem sem mak long olgeta man olsem we i mekem long sam man finis. Be sipos gavman i mekem wan loa we i blong mekem i gud long ol woman no ol pikinini no ol yang boe no ol yang gel no ol man we oli stap daon no ol man blong ol ples we laef blong olgeta i no kam antap, bambae man i no save talem se loa ya i brekem tok blong paragraf (k) ya. Ol loa blong givhan long ol man olsem, no blong lukaotgud long olgeta no blong leftemap laef blong olgeta, bambae oli no save brekem tok blong paragraf ya.


I nomata we man i narafala kala no i kamaot long narafala ples, no i folem narafala fasin blong mekem wosip, no i holem kastom i no skul, no i gat narafala lanwis, no i man, no i woman, be hem i gat raet blong mekem olgeta samting ya mo hem i fri blong mekem olgeta. Be man i no save mekem ol samting ya i kam eskyus blong hem i spolem raet blong narafala man, no blong hem i mekem narafala man i no fri. Mo i no save mekem i kam eskyus blong livim ol prapa fasin blong lukaot long kantri, olsem we ol man oli stap blokem ol enemi, oli stap mekem ples i sef, mo i stap kwaet, mo oli stap lukaotgud long ol man blong oli stap gud oli no sik.


(2) Tok ya antap we i talem se loa i stap blong i lukaot long olgeta man, hem i poen tu long ol fasin ya.


(a) Sipos polis i talem se man i brekem loa, man ya bambae i gat raet blong pas long wan kot we bambae i jajem bisnes blong hem long stret fasin. Kot olsem bambae i afsaed olgeta long bisnes blong man ya, i no haf blong wan saed blong hem, no bambae i miting kwiktaem blong jajem bisnes ya, olsem we ol man oli save talem se i stret. No sipos trabol we polis i talem se man ya i mekem i bigfala, bambae gavman i pem wan loea blong talemaot tok blong man ya long kot.


(b) Nating we polis i talem se man i brekem loa, be olgeta long kot bambae oli luk hem olsem we hem i mekem i stret nomo, gogo fasin blong kot i soemaotgud we hem i brekem loa.


(c) Sipos polis i talemaot long wan man we oli luk se hem i brekem loa, wantaem nomo bambae oli talemgud long hem long wan lanwis we hem i savegud, fasin we oli luk se hem i mekem.


(d) Sipos wan man i gat bisnes long kot be hem i no savegud lanwis we olgeta long kot oli stap yusum, bambae i gat wan man i stap blong tanem olgeta toktok blong kot ya i go long wan lanwis we man ya i save.


(e) Sipos kot i stap jajem bisnes blong wan man, man ya bambae i gat raet blong stap insaed long kot. Sipos man ya i no agri fastaem blong letem olsem, bambae kot ino save gohed blong jajem bisnes ya blong hem taem hem i no stap insaed. Be sipos man ya stap blokem wok blong kot taem hem i stap insaed, bambae kot i save putumaot man ya, nao i save gohed blong jajem bisnes blong hem, we hem i no stap insaed.


(f) Sipos wan man i mekem wan fasin we taem hem i mekem, i no gat wan loa we oli raetemdaon finis, mo i no gat wan loa blong kastom we ol man oli save, we i talem se fasin ya i no stret, nating we biaen Palamen i mekem wan loa we i jajem fasin ya no samfala man oli faenem wan loa blong kastom we i jajem, be bambae kot i no save jajem man ya from fasin ya we hem i mekem fastaem.


(g) Sipos kot i givim panis long man, panis we i givim bambae i no save bitim mak blong panis we i stap long loa long taem ya we man i brekem loa.


(h) Sipos i gat tok se man i brekem loa, nao kot i jajem hem se i no mekem olsem, no i jajem hem se i mas panis, be bambae man ya i no save pas long kot bakegen from bisnes ya, no from sam narafala bisnes we i haf blong bisnes ya nomo, we i stret blong kot i lukluk long hem fastaem. No sipos man i stap panis, nao gavman i sore long hem, i letem hem i go fri, bambae man ya i no save pas long kot bakegen from bisnes ya we kot i jajem hem from fastaem, no from sam narafala bisnes we i haf blong bisnes ya nomo, we i stret blong kot i lukluk long hem fastaem.


HAE KOT BAMBAE I LUKAOT LONG OL RAET WE OL MAN OLI GAT FROM KONSTITUSIN YA


6. (1) Sipos wan man i luk we narafala man i mekem wan fasin long hem finis we i no gat raet blong mekem from ol tok ya blong Konstitusin, no i stap mekem wan fasin olsem, no bambae i save mekem wan fasin olsem, bambae man ya i save askem long Hae Kot blong i blokem narafala man ya blong i no mekem olsem, blong fas man ya i save kasem olsem we Konstitusin ya i givim raet long hem blong i kasem. Mo sipos man i askem long Hae Kot blong i mekem olsem, hemia bambae i no blokem hem se bambae hem i no save folem ol narafala rod blong loa, blong stretem fasin ya we narafala man ya i mekem long hem.


(2) Bambae Hae Kot i save sanem tok blong hem i go long ol man, no i save raetemdaon tok blong hem blong sanem i go long ol man, no i save makem ol fasin we ol man oli mas mekem, blong mekem rod blong man i kasem ol samting we i gat raet blong kasem from Konstitusin ya. Mo Hae Kot ya bambae i save makem mane we man i mas pem long narafala man blong stretem fasin we i mekem, we i spolem raet blong narafala man ya.


HAF NAMBA TU


OL FASIN WE OL MAN OLI MAS MEKEM


OL FASIN WE OL MAN OLI MAS MEKEM


7. I gat ol fasin we i gud yumi evriwan bambae yumi mekem blong leftemap laef blong yumi, mo laef blong ol pikinini we bambae oli kamaot biaen long yumi.


(a) Yumi evriwan i mas ona long Konstitusin ya mo yumi mas folem tingting blong hem long laef blong yumi.


(b) Yumi evriwan i mas luksave we sipos yumi no joengud long ol wok blong leftemap laef blong yumi evriwan blong kantri ya blong yumi, bambae yumi no save leftemap laef blong yumi wanwan blong i kasem fulmak blong hem, mo yumi no save kasem prapa gudfala laef blong yumi.


(c) Yumi evriwan i mas yusum ol raet we Konstitusin ya i givim long yumi, mo yumi mas joengud blong mekem ol wok we Konstitusin ya i givim long yumi blong mekem Ripablik blong yumi i gohed gud.


(d) Yumi ol man Nyuhebredis, yumi mas lukaotgud long kantri ya blong yumi, yumi mas blokem ol enemi blong yumi oli no kam spolem hem. Yumi evriwan i mas lukaotgud long olgeta samting we i stap finis long kantri ya we oli mekem i rij, mo yumi mas holemgud olgeta samting blong kantri ya we yumi save yusum blong mekem kantri i gohed. Mo yumi mas lukaotgud blong ples i stap gud, i stap klin, i no kam nogud, i no kam doti, blong yumi save stap gud long hem wetem ol pikinini we bambae oli kamaot biaen long yumi.


(e) Yumi evriwan i mas wok strong long wok we i stret long yumi, mo we i save leftemap laef blong yumi evriwan. Mo sipos i no gat wok olsem blong yumi, bambae yumi mas traehad blong statem ol wok olsem.


(f) Yumi evriwan i mas luklukgud long yumi blong yumi no spolem ol raet blong yumi, mo yumi no blokem yumi blong yumi no moa fri. Long fasin ya, bambae yumi save joengud olsem wan kampani nomo, we yumi evriwan i stap givgivhan long yumi.


(g) Yumi evriwan i mas pem takis blong gavman long mak blong mane we yumi gat, olsem we loa i talem, from we gavman i mas gat ol mane ya blong leftemap Ripablik blong yumi, mo blong mekem ol wok we i stap blong mekem long kantri ya blong yumi.


(h) Yumi evriwan we yumi papa no yumi mama, yumi mas lukaot long olgeta pikinini blong yumi, yumi mas givhan long olgeta, mo yumi mas sanem olgeta oli go long skul blong pikinini. Mo yumi mas mekem olgeta oli savegud ol raet blong olgeta, mo ol fasin we oli mas mekem from we oli man ples. Mo yumi mas mekem olgeta oli savegud ol fasin mo ol kastom blong yumi.


(i) Yumi evriwan we yumi pikinini, yumi mas ona long ol papa mo mama blong yumi.


HAF TOK YA NAMBA TU I NO LOA WE I TALEM SE BAMBAE OL MAN OLI MEKEM OL FASIN YA


8. Ol tok ya antap i no olsem loa we i talem se bambae ol man oli mekem ol fasin ya. Mo sipos i no gat narafala loa bakegen long ol fasin ya, bambae kot i no save jajem man we i no mekem wan long olgeta. Be nating, olgeta haf blong gavman oli mas traehad oltaem blong mekem tingting blong olgeta man i strong blong folem ol fasin ya long laef blong olgeta.


JAPTA TRI


OL MAN PLES BLONG NYUHEBREDIS


OL MAN WE LONG DEI BLONG INDEPENDEN WANTAEM NOMO BAMBAE OLI KAM MAN PLES BLONG NYUHEBREDIS


9. Long dei ya we Nyuhebredis bambae i kam independen i gat sam man we wantaem nomo bambae oli gat raet blong karem nem se man ples blong Nyuhebredis.


(a) Olgeta we ol fo stret bubu blong olgeta oli stret netif blong Nyuhebredis, olgeta ya wantaem nomo baebae oli gat raet blong karem nem olsem.


(b) Mo olgeta we wan long ol olfala blong olgeta bifo i stret netif blong Nyuhebredis, mo oli no man ples blong narafala kantri mo oli no stap aninit long flaeg blong narafala kantri, olgeta ya tu, wantaem nomo bambae oli gat raet blong karem nem olsem.


OL MAN WE LONG DEI BLONG INDEPENDEN BAMBAE OLI SAVE ASKEM BLONG KAM MAN PLES BLONG NAHEBREDIS


10. Long dei ya we Nyuhebredis bambae i kam independen, olgeta we wan olfala blong olgeta bifo i stret netif blong Nyuhebredis, be oli man ples blong narafala kantri no oli stap aninit long flaeg blong narafala kantri, sipos olgeta olsem oli wantem kam man ples blong Nyuhebredis, bambae oli save askem long gavwan blong kam man ples olsem. Bambae i gat tri manis biaen long dei ya blong independen, no moa long tri manis sipos Palamen i mekem loa long hem, blong ol man olsem oli sanem tok blong olgeta i kam long gavman, mo sipos oli no sanem tok blong olgeta i kam, bambae oli no save karem nem ya se man ples, long fasin ya. Sipos gavman i talem long wan man olsem se hem i kam man ples blong Nyuhebredis long fasin ya, bambae man ya i mas tekemaot nem blong hem long narafala kantri ya blong hem. Bambae gavman i givim tri manis long man olsem, no moa long tri manis sipos Palamen i mekem loa long hem, blong man olsem i tekemaot nem blong hem olsem. Mo sipos man i no mekem olsem, bambae hem i no moa save karem nem se man ples blong Nyuhebredis.


Ol pikinini blong ol man olsem we long dei ya blong independen, yia blong olgeta bambae i no kasem eitin ya yet, papa no mama blong olgeta, mo man we i stap lukaot long olgeta bambae i save askem long gavman blong oli karem nem se man ples blong Nyuhebredis olsem. Bambae i gat tri manis biaen long dei ya blong independen, no moa long tri manis sipos Palamen i mekem loa long hem, blong ol man olsem oli sanem tok blong olgeta i kam long gavman, no sipos oli no sanem tok blong olgeta i kam, bambae ol pikinini ya oli no save karem nem ya se man ples, long fasin ya. Nao taem ol pikinini ya oli kasem eitin yia blong olgeta, bambae gavman i givim tri manis long olgeta blong oli tekemaot nem blong olgeta long narafala kantri ya blong olgeta. Mo sipos oli no mekem olsem, bambae oli no moa save karem nem ya se man ples blong Nyuhebredis.


OLGETA WE BAMBAE OLI BON LONG TAEM WE NYUHEBREDIS I INDEPENDEN FINIS


11. Olgata we bambae oli bon long taem we Nyuhebredis i independen finis, i nating we oli bon long Nyuhebredis no long ovasi, be sipos papa no mama blong olgeta i man ples blong Nyuhebredis bambae olgeta oli man ples blong Nyuhebredis.


OL NARAFALA MAN WE OLI WANTEM KAM MAN PLES BLONG NYUHEBREDIS


12. Sipos wan man we i man ples blong narafala kantri no we i no gat kantri blong hem, hem i stap ten yia finis long Nyuhebredis no moa long ten yia, noa hem i wantem kam man ples blong Nyuhebredis, bambae hemi save askem long gavman blong i kam man ples.


Palamen bambae i save mekem sam narafala loa bakegen, blong mekem rod blong ol man we oli wantem kam man ples blong Nyuhebredis long fasin ya, mo bambae hem i save putum ol man blong oli lukluk long ol tok blong ol man ya blong givim ansa long olgeta.


MAN PLES BLONG NYUHEBREDIS I NO SAVE KAM MAN PLES BLONG TU KANTRI WANTAEM


13. Ripablik blong Nyuhebredis bambae i no save letem man blong hem i stap aninit long tu flaeg. Sipos man we i kam man ples blong Nyuhebredis i stap aninit long flaeg blong narafala kantri finis, bambae i mas tekemaot nem blong hem long narafala kantri ya blong hem. Mo sipos man we i man ples blong Nyuhebredis finis i kam aninit long flaeg blong narafala kantri, bambae i mas tekemaot nem blong hem long narafala kantri ya blong hem. Bambae gavman i givim tri manis long ol man olsem, no moa long tri manis sipos Palamen i mekem loa long hem, mo sipos man olsem i no tekemaot nem blong hem long narafala kantri ya blong hem long taem ya, bambae hem i no moa save karem nem ya se man ples blong Nyuhebredis.


Be taem pikinini we i man ples blong Nyuhebredis mo i aninit long flaeg blong narafala kantri i kasem we i gat eitin ya blong hem, bambae gavman i givim tri manis long hem blong i tekemaot nem blong hem long narafala kantri ya blong hem. Sipos hem i no mekem olsem, bambae hem i no moa save karem nem ya se man ples blong Nyuhebredis.


14. Bambae Palamen i save mekem sam moa loa bakegen blong mekem rod blong ol man we tok antap blong japta ya i no kavremap olgeta, blong oli save kam man ples blong Nyuhebredis. Mo bambae hem i save mekem loa blong tekemot raet blong man blong karem nem ya se man ples blong Nyuhebredis, mo blong letem man i tekemaot nem blong hem se hem bambae i no moa karem nem ya.


JAPTA FO


PALAMEN


PALAMEN


15. Ol man we ol man ples bambae oli jusumaot olgeta blong mekem wok blong gavman bambae oli wan kampani nomo, bambae oli wok wanples blong mekem ol wok ya, mo nem blong olgeta ya Palamen.


OLGETA WE I GAT PAOA BLONG MEKEM OL LOA


16. (1) Palamen ya bambae i save mekem ol loa blong mekem Nyuhebredis i stap kwaet, mo blong mekem olgeta man i gat gudfala laef, mo blong mekem wok blong gavman i gohed gud.


(2) Fasin we Palamen bambae i mekem ol loa, bambae Praeminista, no wan long ol Minista, no wan memba blong Palamen, no moa long wan memba blong Palamen i putum mosen, nao Palamen bambae i vot long hem, mo sipos i agri long mosen ya, bambae hem i save kam loa.


(3) Sipos Palamen i agri finis long wan mosen olsem, bambae i sanem tok blong hem i go long Presiden blong Ripablik. Nao Presiden ya bambae i saen long tok ya kwiktaem we bambae i no gat fotin dei i pas, blong soemaot we tok ya i kam loa blong Ripablik blong Nyuhebredis.


(4) Sipos Presiden ya i luk se wan tok olsem blong Palamen i no stret long Konstitusin ya, bambae hem i save sanem tok ya i go long Hae Kot blong i jekemap, nao i talemaot tingting blong hem long Presiden ya. Mo sipos Hae Kot ya i talem we i ting se tok ya blong Palamen i no stret long Konstitusin, bambae Presiden blong Ripablik i no save saen long hem.


FASIN BLONG JUSUMAOT OL MEMBA BLONG PALAMEN


17. (1) Palamen bambae i gat ol memba blong hem, we olgeta man ples bambae oli vot blong jusumaot olgeta. Mo fasin blong mekem eleksen bambae i letem we namba blong ol pati we oli holem jea bambae i folem namba blong ol man ples we oli vot from ol pati ya. Nao long fasin ya, olgeta grup blong politik mo ol man we oli gat ol naranarafala tingting bambae oli save gat ol memba blong olgeta oli stap long Palamen.


(2) Sipos Palamen i no mekem loa blong blokem samfala man, olgeta man ples blong Nyuhebredis we oli gat twantefaef yia blong olgeta, no oli gat moa long twantefaef yia blong olgeta, bambae oli gat raet blong kam kandidet long eleksen blong Palamen.


KOMITI BLONG LUKAOT LONG OL ELEKSEN


18. (1) Bambae i gat Komiti blong Lukaot long ol Eleksen. Bambae Komiti ya i lukaot long ol bisnes blong tekem nem blong ol man we bambae oli save vot. Mo bambae i lukaot long ol bisnes blong ol eleksen blong jusumaot ol memba blong Palamen, mo ol memba blong Kaonsel blong Olgeta Jif, mo ol memba blong ol Kaonsel blong Distrik.


(2) Sipos i gat toktok blong bambae Palamen i jenisim loa blong tekem nem blong ol man we bambae oli save vot, no loa blong fasin blong eleksen blong jusumaot ol memba blong ol samting ya antap, ol toktok olsem bambae i pas long Komiti blong Lukaot long ol Eleksen fastaem, blong hem i save talemaot tingting blong hem long Palamen, nao biaen Palamen bambae i save vot long toktok ya.


(3) Komiti ya blong Lukaot long ol Eleksen, bambae i gat tri memba blong hem. Jeman blong Palamen bambae i Jeman blong hem. Mo Komiti blong Lukaot long ol Wok blong ol Jaj bambae i jusumaot tu man blong tufala i memba blong hem. Tufala ya bambae i no memba blong Palamen mo Kaonsel blong Olgeta Jif mo ol Kaonsel blong Distrik, mo bambae tufala i no kandidet blong eleksen long ol samting ya tu. Nao Presiden blong Ripablik bambae i putumap tufala long wok ya.


(4) Sipos man we i memba blong Komiti ya blong Lukaot long ol Eleksen i mekem wan fasin no wan samting we sipos i bin mekem fastaem, bambae oli no save putum hem i kam memba blong Komiti ya, ale, hem bambae i finis long Komiti ya from we i mekem olsem.


(5) Sipos Komiti ya blong Lukaot long ol Eleksen i stap mekem wok blong hem, i no gat narafala man i save tok long hem from, no i save kam bos long hem, hem nomo bambae i bos long wok we i stap long han blong hem.


FASIN WE PALAMEN BAMBAE I WOK


19. (1) Palamen bambae i mekem miting tu taem long wan yia blong mekem ol wok blong hem.


(2) Palamen bambae i save mekem spesel miting blong hem. Sipos Praeminista no Jeman blong Palamen no bighaf blong ol memba blong Palamen i gat spesel samting blong tokbaot, bambae i save singaot spesel miting blong hem, nao bambae Palamen i mekem.


(3) Oltaem ol memba blong Palamen bambae oli vot long fasin we ol man oli save luk tingting blong olgeta, blong mekem disisin long toktok we i stap long fes blong olgeta, nao oltaem bighaf blong olgeta we oli vot bambae oli win. Be samtaem, from sam spesel tingting, bambae Palamen i save holem narafala fasin lelebet blong mekem disisin, mo tok blong makem ol spesel tingting ya i stap olbaot long Konstitusin ya.


(4) Oltaem plante memba blong Palamen oli mas stap insaed, blong Palamen i save mekem miting. Sipos i gat tri memba, bambae tu i mas stap insaed, sipos i gat tri memba, bambae tu i mas stap insaed. Sipos namba blong ol memba i no kasem mak ya long fas dei blong miting, bambae Palamen i save wet tri dei, nao sipos moa long stret haf blong ol memba blong hem oli stap insaed, bambae Palamen i save mekem miting long mak ya, go kasem en blong miting ya blong hem. Be samtaem, from sam spesel tingting, namba blong ol memba we bambae oli mas stap insaed blong Palamen i save mekem miting, i save folem narafala fasin, olsem we i talem long Konstitusin ya.


(5) Palamen nomo bambae i mekem ol rul we bambae i folem blong mekem ol wok blong hem.


JEMAN BLONG PALAMEN MO NAMBA TU BLONG HEM


20. (1) Oltaem, biaen long bigfala Eleksen, taem Palamen i mekem fas miting blong hem, long fas dei blong miting, hem bambae jusumaot Jeman blong hem wetem wan man mo moa long wan man blong oli namba tu blong Jeman ya.


(2) Jeman ya bambae i tekem jea long evri miting blong Palamen, mo bambae i wok blong hem blong meken ol miting i ron stret.


(3) Be sipos Jeman ya i no stap, bambae Namba Tu Jeman i save mekem olgeta wok blong Jeman.


OL KOMITI


21. Palamen bambae i save stanemap ol Komiti blong hem mo bambae i save jusumaot ol memba blong olgeta, i save putumap olgeta.


OL MITING BLONG PALAMEN I OPEN LONG PABLIK


22. Oltaem, miting blong Palamen bambae i open long olgeta man blong oli save go lesin. Be sipos Palamen i wantem mekem miting long narafala fasin, bambae i save mekem.


OL MANE BLONG GAVMAN


23. (1) Evri yia, Kampani blong ol Memba blong Palamen we oli Holem Gavman, bambae hem i tekem Plan blong Mane we Gavman bambae i Yusum i kam insaed long Palamen blong Palamen i agri long hem.


(2) Palamen nomo bambae i gat raet blong putum takis, mo blong jenisim takis, mo blong letem ol man we oli stap wok blong gavman oli yusum mane, mo bambae i mekem loa blong mekem ol samting ya.


(3) Kampani ya we i Holem Gavman, hem nomo bambae i gat raet blong mekem ol tok blong mane. Sipos narafala man i wantem mekem mosen blong putum takis, no blong leftemap takis, no blong letem ol man we oli stap wo, wok blong gavman oli yusum mane, be Kampani ya i no agri long hem, bambae Palamen i no save tokbaot mosen ya.


(4) Palamen bambae i mekem loa blong mekem rod blong i gat Hed Akaonten blong Gavman, mo Komiti blong lukaot long ol Man we oli stap wok blong Gavman, hem wan bambae i jusumaot man blong i tekem wok ya, mo bambae i putumap hem.


(5) Wok blong Hed Akaontaen, bambae hem i stap jekemap ol ripot blong ol mane we ol man we oli stap wok blong Gavman blong Nyuhebredis oli spenem, mo bambae i mekem ripot blong hem, i givin long Palamen mo long Kampani ya blong ol Memba blong Palamen we oli Holem Gavman.


(6) Sipos Hed Akaontaen ya i stap mekem wok blong hem, bambae i no gat narafala man i save tok long hem from, no i save kam bos blong hem, hem nomo bambae i bos long wok we i stap long han blong hem.


OL PROMES WE RIPABLIK BLONG NYUHEBREDIS I MEKEM WETEM OL NARAFALA KANTRI


24. Sipos Gavman blong Ripablik blong Nyuhebredis i wantem mekem promes wetem Gavman blong narafala kantri blong mekem sam samting, bambae i save tekem promes olsem i kam long Palamen blong Palamen i agri long hem, nao promes ya bambae i stanap.


(a) Sipos promes i kasem ol kampani we ol narafala kantri olbaot long wol oli joen long hem, no i promes se Nyuhebredis wetem narafala kantri bambae tufala i no save faet, no i promes blong fasin we bambae tufala i mekem bisnes, bambae promes ya i kam long Palamen fastaem blong Palamen i agri long hem, nao bambae i stanap.


(b) Sipos promes olsem i talem we Gavman blong Nyuhebredis bambae i spenem ol mane blong hem, bambae promes ya i kam long Palamen fastaem.


(c) Sipos promes olsem i jenisim laef blong ol man Nyuhebredis long sam fasin, bambae promes ya i kam long Palamen fastaem.


(d) Sipos promes olsem i min se Palamen i mas jenisim samfala loa fastaem blong mekem promes i wok, bambae promes ya i kam long Palamen fastaem.


(e) Sipos promes olsem i seftem mak blong graon we i blong Nyuhebredis, olsem we i tekemaot sam graon, nao i joenem moa graon bakegen, no i jenjenisim graon wetem narafala kantri, bambae promes ya i kam long Palamen fastaem.


SPESEL RAET WE OL MEMBA BLONG PALAMEN I GAT


25. Sipos memba blong Palamen i sakem sam strong tok insaed long Palamen, no i mekem vot we i agens long narafala man, bambae polis i no save holem hem from, mo i no save putum hem long kalabus, mo narafala man tu bambae ino save tekem hem i go long kot.


(2) Sipos memba blong Palamen i gat wan trabol, bambae polis i no save holem hem long taem blong miting blo Palamen, no long taem blong miting blong komiti blong Palamen. Bambae polis i save holem hem, sipos Palamen i letem, be bambae hemia from samfala poen nomo we Palamen i luk se polis i mas tekemaot hem from.


TAEM BLONG WOK BLONG PALAMEN


26. (1) Biaen long eleksen, Palamen bambae i stanap blong mekem wok blong hem blong fo ya. Be bambae hem i save finis long wok blong hem, olsem we tok blong paragraf (2) no paragraf (3) daon i talem.


(2) Sipos Palamen i wantem talem se hem bambae i finis long wok blong hem, nao bambae i mas gat eleksen bakegen, bambae hem i save mekem olsem. Oltaem, sipos wan memba i wantem mekem olsem, bambae hem i talem long Jeman blong Palamen, nao biaen long wan wik bambae i gat wan spesel miting blong Palamen blong tokbaot bisnes ya. Long miting ya, sipos i gat fo memba blong Palamen, bambae tri memba i mas stap long miting, sipos i gat fo memba, bambae tri i mas stap long miting. Nao taem oli vot from, sipos moa long stret haf blong olgeta memba blong Palamen oli agri, bambae Palamen i finis long wok blong bem.


(3) Sipos Kampani blong ol Memba blong Palamen we oli Holem Gavman i talem long Presiden blong Ripablik we i wantem blong Palamen i finis, Presiden ya i save talemaot se Palamen bambae i finis long wok blong hem.


(4) Sipos Palamen i finis long wok blong hem, bambae i gat bigfala eleksen bakegen. Bambae eleksen ya i no save kam kwiktaem we i no kasem tate dei yet, mo bambae i no save stap longtaem go bitim sikiste dei.


(5) Sipos Palamen i finis long wok blong hem long fasin ya we paragraf (2) no paragraf (3) i talem, taem i gat eleksen bakegen, bambae nyufala Palamen ya i wok go kasem twelef manis, we bambae i no finis long wok blong hem bakegen long fasin ya.


JAPTA FAEF


KAONSEL BLONG OLGETA JIF BLONG NYUHEBREDIS


27. (1) Kaonsel blong Olgeta Jif blong Nyuhebredis, ol Kaonsel blong Olgeta Jif blong Distrik bambae oli jusumaot ol jif blong oli sidaon insaed long Kaonsel ya.


(2) Kaonsel ya nomo bambae i mekem ol rul we bambae i folem blong mekem ol wok blong hem.


(3) Kaonsel ya bambae i mekem miting wan taem long wan yia, mo moa long wan taem sipos i wantem. Sipos Kampani blong ol Memba blong Palamen we oli holem Gavman, no Palamen, no Kaonsel ya nomo i wantem, bambae Kaonsel ya i save mekem sam moa miting bakegen.


(4) Taem Kaonsel ya i stanap, long fas miting blong hem bambae ol memba blong Kaonsel ya oli jusumaot Presiden blong Kaonsel.


OL WOK BLONG KAONSEL


28. (1) Kaonsel blong Olgeta Jif blong Nyuhebredis ya i gat paoa blong tokbaot olgeta bisnes blong kastom mo olgeta fasin blong bifo. Mo Kaonsel ya bambae i save givim toktok long Palamen, mo long Kampani ya blong ol Memba blong Palamen we oli Holem Gavman, blong oli save lukaotgud long ol kastom, mo ol lanwis blong Nyuhebredis, mo blong oli save mekem ol samting ya oli kam strong moa.


(2) Bambae Palamen i save sidaon wetem Kaonsel ya blong tokbaot olgeta samting. Mo nambawan samting we oli save tokbaot, hemia kastom mo ol fasin blong bifo we i stret wetem samfala mosen we Palamen bambae i tokbaot.


FASIN BLONG STANEMAP KAONSEL YA MO WOK BLONG OL JIF


29. Palamen bambae i mekem loa blong mekem rod blong stanemap Kaonsel blong Olgeta Jif blong Nyuhebredis, mo blong makem ol wok blong hem. Loa ya bambae i makem tu ol wok we ol jif bambae oli mekem long velej, mo long aelan, mo long distrik.


SPESEL RAET WE OL MEMBA BLONG KAONSEL YA I GAT


30. (1) Sipos memba blong Kaonsel blong Olgeta Jif i sakem sam strong tok insaed long Kaonsel ya, no i mekem vot insaed long Kaonsel ya we i agens long narafala man, bambae polis i no save holem hem from, mo i no save putum hem long kalabus. Mo narafala man tu i no save tekem hem i go long kot.


(2) Sipos memba blong Kaonsel ya i gat wan trabol, bambae polis i no save holem hem long taem blong miting blong Kaonsel, no long taem blong miting blong ol Komiti blong Kaonsel. Bambae polis i save holem hem, sipos Kaonsel ya i letem, be bambae hemia from samfala poen nomo we Kaonsel i luk se polis i mas takemaot hem from.


JAPTA SIKIS


HED BLONG KANTRI


PRESIDENT BLONG RIPABLIK


31. Hed blong Repablik blong Nyuhebredis, bambae nem blong hem Presiden blong Ripablik, mo wok blong hem i blong soemaot we kantri ya i stanap long wan tingting nomo.


FASIN BLONG JUSUMAOT PRESIDEN BLONG RIPABLIK


32. Komiti blong Jusumaot Presiden blong Ripablik, bambae i gat olgeta memba blong Palamen wetem olgeta Presiden blong ol Kaonsel blong Distrik. Bambae oli vot long fasin ya we narafala man bambae i no save tingting blong narafala man. Mo fasin blong mekem vot ya bambae i folem ol tok blong Ol Spesel Rul Namba Wan we i stap long en blong Konstitusin ya.


MAN WE I SAVE KAM PRESIDEN BLONG RIPABLIK


33. Netif blong Nyuhebredis we i stret blong ol man oli elektem hem blong i kam memba blong Palamen, man olsemia nao, Komiti blong Jusumaot Presiden blong Ripablik bambae i save jusumaot hem blong i kam Presiden.


FASIN WE PRESIDEN BAMBAE I HOLEM WOK BLONG HEM, MO FASIN WE OLI SAVE TEKEMAOT HEM LONG WOK BLONG HEM


34. (1) Taem Presiden blong Ripablik i tekem wok blong hem, bambae hem i save holem wok ya blong faef yia.


(2) Komiti ya blong Jusumaot Presiden blong Ripablik, we tok blong namba 32 i talem, hem bambae i gat paoa blong tekemaot Presiden blong Ripablik bakegen. Be bambae hem i save tekemaot hem from tufala poen ya nomo.


(a) from we hemi i mekem bigfala trabol,


(b) mo from we hemi i no strong, i no moa save mekem wok blong hem. Sipos mosen blong tekemaot Presiden long wok blong hem i kam insaed long Komiti ya, be bambae plante memba oli mas agri fastaem blong tekem i kam insaed. Sipos i gat tri memba blong Komiti ya, be wan i mas agri fastaem blong tekem i kam, sipos i gat tri memba blong Komiti ya, be wan i mas agri fastaem blong tekem i kam. Mo taem oli vot, plante memba oli mas stap insaed. Sipos i gat fo memba blong Komiti ya, bambae tri memba i mas stap insaed sipos i gat fo memba blong Komiti ya, bambae tri memba i mas stap insaed. Mo bakegen, sipos i gat fo Presiden blong ol Kaonsel blong Distrik, bambae tri long olgeta i mas stap insaed. Nao taem oli vot long mosen ya, plante memba bambae oli mas agri long hem. Sipos i gat tri memba blong Komiti ya, bambae tu i mas agri long hem, sipos i gat tri memba blong Komiti ya, bambae tu i mas agri long hem.


(3) Sipos ol man oli wantem mekem mosen olsem we tok blong paragraph (2) antap i talem, bambae oli talemaot samting ya long Jeman blong Palamen fastaem, nao taem tu wik i pas, bambae Komiti ya i mekem miting blong tokbaot mosen ya.


(4) Sipos long fas miting blong Komiti ya, namba blong ol memba i no kasem tok we paragraph (2) antap i talem, Komiti ya bambae i save mekem miting bakegen taem wan wik i pas, blong vot long mosen ya we tok blong paragraph (2) antap i tokbaot, nating we namba blong olgeta i no bigwan olsem we paragraph ya i talem. Namba blong ol memba blong Komiti ya we i naf blong mekem seken miting ya, sipos i gat tri memba blong Komiti, bambae tu i mas stap long miting, sipos i gat tri memba blong Komiti, bambae tu i mas stap long miting.


JEMAN BLONG PALAMEN I SAVE MEKEM WOK BLONG PRESIDEN


35. Sipos samtaem i no moa gat Presiden blong Ripablik, no Presiden i stap ovasi, no hem i no strong, i no save mekem wok blong hem, bambae Jeman blong Palamen i mekem ol wok blong Presiden. Sipos samtaem i no moa gat Presiden blong Ripablik, long taem ya bambae i mas gat eleksen blong jusumaot nyufala Presiden kwiktaem, we bambae tri wik i no pas yet.


PRESIDEN BLONG RIPABLIK I SAVE KATEM PANIS BLONG MAN


36. Presiden blong Ripablik bambae i save sore long man we kot i putum hem long kalabus, i save letem i gofri. Mo i save jenisim panis blong hem, mo i save katem taem blong kalabus blong hem i kam sotfala. Palamen i save putumap wan komiti blong i givhan long Presiden blong i mekem wok ya.


JAPTA SEVEN


PAOA BLONG GAVMAN


PAOA BLONG MEKEM WOK BLONG GAVMAN


37. (1) Olgeta man ples blong Repablik blong Nyuhebredis i holem paoa blong Gavman, be olgeta i givim paoa blong mekem wok blong gavman long Praeminista wetem Kaonsel blong ol Minista, mo olgeta ya bambae oli mekem wok blong gavman olsem we Konstitusin wetem ol narafala loa i talem.


(2) Oltaem Praeminista bambae i stap givim ripot long ol wok blong Gavman blong Ripablik long Presiden, blong hem i savegud ol wok blong Gavman we i stap gohed.


(3) Sipos Presiden blong Ripablik i luk se wan rul we Praeminista olgeta oli mekem i no stret long Konstitusin ya, bambae hem i save sanem rul ia i go long Hae Kot blong i jekemap, nao i talemaot tingting blong hem long Presiden ya.


KAONSEL BLONG OL MINISTA


38. (1) Bambae i gat Kaonsel blong ol Minista, we ol memba blong hem, bambae i gat Praeminista wetem olgeta Minista blong Gavman.


(2) Namba blong ol Minista wetem Praeminista bambae i no plante. Sipos i gat fo memba blong Palamen, bambae wan nomo i save kam minister, sipos i gat fo memba blong Palamen, bambae wan nomo i save kam minista.


FASIN BLONG JUSUMAOT PRAEMINISTA


39. Palamen bambae i jusumaot Praeminista long olgeta ya we oli memba blong Palamen. Blong jusumaot Praeminista, ol memba blong Palamen bambae oli mekem vot long fasin ya we narafala man bambae i no save tingting blong narafala man. Mo fasin blong mekem eleksen ya bambae i folem ol tok blong Ol Spesel Rul Namba Tu, we i stap long en blong Konstitusin ya.


FASIN BLONG PUTUMAP OL MINISTA, MO BLONG TEKEMAOT MINISTA LONG WOK BLONG HEM


40. (1) Praeminista bambae I jusumaot sam memba blong Palamen blong oli kam Minista mo bambae hem i putumap olgeta. Hem is save putumap wan long ol Minista ya blong i kam Namba Tu Praeminista.


(2) Praeminista bambae i seraot ol wok blong Gavman i go long han blong ol Minista blong oli lukaot long ol wok ya.


(3) Sipos Praeminista i wantem tekemaot wan Minista long wok blong hem bakegen, bambae hem i save mekem.


OL MINISTA BAMBAE OLI FOLEM WAN TINGTING NOMO, MO FASIN BLONG GIVIM TOK LONG PRAEMINISTA SE OL MAN OLI NO TRASTEM HEM


41. (1) Long fes blong Palamen olgeta Minista bambae i stanap olsem wan man nomo, mo bambae oli gat wan tingting nomo long ol wok blong olgeta.


(2) Palamen bambae i save agri long mosen blong talemaot we ol memba blong hem oli no trastem Praeminista. Sipos sam memba oli wantem mekem moa olsem, bambae oli talemaot long Jeman blong Palamen, mo sipos i gat sikis memba blong Palamen, bambae wan i mas saen long mosen ya, sipos gat sikis memba blong Palamen, bambae wan i mas saen long mosen ya. Nao taem wan wik i pas, bambae Palamen i tokbaot mosen ya. Sipos moa long stret haf blong ol memba blong Palamen oli agri long mosen ya, Praeminista wetem ol Minista bambae oli finis long nem ya Minista stret long dei ya, be bambae oli holem wok blong olgeta, gogo kasem Palamen i jusumaot nyufala Praeminista bakegen.


SAMTING WE I MEKEM OLGETA MINISTA I FINIS LONG WOK BLONG OLGETA


42. Sipos Praeminista i risaen, no i ded, Kaonsel blong ol Minista bambae i finis, olgeta Minista oli no moa save holem nem ya Minista, be bambae oli holem wok blong olgeta gogo kasem we Palamen i jusumaot nyufala Praeminista bakegen. Sipos Praeminista i ded, Numba Tu Praeminista bambae i mekem wok blong Praeminista, gogo kasem we Palamen i jusumaot nyufala Praeminista bakegen. No sipos i no gat Namba Tu Praeminista, Presiden blong Ripablik bambae i jusumaot wan Minista, i putumap hem, nao hem bambae i mekem wok blong Praeminista, gogo kasem we Palamen i jusumaot nyufala Praeminista bakegen.


OL NARAFALA SAMTING WE OLI SAVE MEKEM MINISTA I FINIS LONG WOK BLONG HEM


43. I gat ol narafala samting tu we oli save mekem Praeminista no Minista bambae i finis long wok blong hem.


(a) Sipos kantri i mekem bigfala eleksen, nao biaen Palamen i mekem miting blong jusumaot nyufala Praeminista, bambae Praeminista we i stap holem wok, wetem olgeta Minista, oli finis long wok blong olgeta.


(b) Sipos Palamen i no finis long wok blong hem, be Praeminista no Minista i finis long memba blong Palamen, bambae hemi i no moa save holem nem ya Minista.


(c) Sipos Minista i kam Presiden blong Ripablik, no Jeman blong Palamen, bambae hem i no moa save holem nem ya Minista.


OL MINISTA OLI MEMBA BLONG PALAMEN


44. Ol memba blong Palamen we oli kam Minista, bambae oli memba yet blong Palamen.


JAPTA EIT


WOK BLONG JAJEM TRABOL


OL JAJ


45. (1) Bambae i gat ol jaj i stap, mo i bisnes blong olgeta blong lukaot long ol wok blong jajem trabol, blong wok ya i gohed long stret fasin. Ol jaj ya, oli no gat narafala bos blong olgeta, Konstitusin ya wetem Loa blong Nyuhebredis, hemia nomo i bos blong olgeta. I wok blong ol jaj blong oli jajem ol trabol long fasin we Loa ya i talem. Sipos kot i gat wan trabol i stap long hem blong i jajem, we i no gat loa i stap blong makem wanem fasin i stret long hem, bambae jaj i save jajem trabol ya long fasin we ol man oli luk se i stret gud, mo evri taem i gat rod, bambae jaj i save folem loa blong kastom blong jajem trabol olsem.


KOMITI BLONG LUKAOT LONG OL WOK BLONG OL JAJ


46. (1) Bambae i gat wan komiti i stap, we nem blong hem Komiti blong Lukaot long ol Wok blong ol Jaj. Jeman blong Komiti ya, Minista we i lukaot long ol wok blong jajem trabol, mo ol memba blong Komiti ya, bambae i gat Hed Jaj, mo Jeman blong Komiti blong Lukaot long ol Man we oli stap Wok blong Gavman, mo wan narafala jaj we Presiden blong Ripablik i putumap hem, we i save holem wok ya blong tri yia, mo wan memba blong Kaonsel blong Olgeta Jif, we Kaonsel ya i putumap hem.


(2) Sipos Komiti ya blong Lukaot long ol Wok blong ol Jaj i stap mekem wok blong hem, bambae i no gat narafala man i save tok long hem from, no i save kam bos blong hem, hem nomo bambae i bos long ol wok we i stap long han blong hem.


FASIN BLONG PUTUMAP OL JAJ


45. (2) Hed Jaj wetem ol Jaj blong Hae Kot, bambae i gat narafala fasin blong jusumaot olgeta we tok blong hem i stap long namba 47, long paragraph (3) mo paragraph (4), be ol narafala jaj, Komiti ya blong Lukaot long ol Wok blong ol Jaj bambae i jusumaot olgeta, mo Presiden blong Ripablik bambae i putumap olgeta.


(3) Man we i jaj bambae i holem wok ia gogo i kasem taem we hem i olfala, nao yia blong hem i stret long hem i finis long wok. Presiden blong Ripablik i save tekemaot man long wok blong jaj, be from wan long tufala samting ya nomo.


(a) Sipos jaj i brekem wan long ol loa ya we Loa i talem se i bigfala, mo kot i jajem hem se bambae i mas panis, Presiden blong Ripablik bambae i tekemaot jaj ya long wok blong hem.


(b) Sipos Komiti blong Lukaot long ol Wok blong ol Jaj i luk we wan jaj i mekem bigfala trabol, no i luk we wan jaj i no moa strong, i no moa save mekem wok blong hem, no i luk we wan jaj i no wok gud long wok blong hem, bambae i talemaot samting ya long Presiden blong Ripablik, nao Presiden ya bambae i tekemaot jaj ya long wok blong hem.


(4) Komiti ya blong Lukaot long ol Wok blong ol Jaj, hem nomo bambae i save muvum jaj i aot long wan wok, i go long narafala wok, mo hem nomo bambae i save makem jaj we bambae i tekem wok we i hae moa. Mo Presiden blong Ripablik nomo, bambae i putumas ol jaj long ol nyufala wok blong olgeta.


HAE KOT MO HED JAJ MO OL NARAFALA JAJ BLONG HAE KOT


47. (1) Bambae Hae Kot i save jajem olgeta trabol we wan man i gat poen long narafala man, wetem olgeta trabol we man i brekem loa, mo bambae i save jajem ol narafala bisnes tu, mo i save mekem ol narafala wok, olsem we Konstitusin ya i talem, no Loa blong Nyuhebredis is talem


(2) Long Hae Kot, bambae i gat Hed Jaj wetem tri narafala jaj bakegen.


(3) Presiden blong Ripablik nomo bambae i putumap man i kam Hed Jaj. Bambae Presiden ya i go toktok wetem Praeminista mo Lida blong bigfala Kampani blong ol Memba blong Palamen we oli Oposisin, blong jusumaot jaj ya, nao bambae hem i putumap hem.


(4) Tri narafala jaj ya blong Hae Kot, wan, Jeman blong Palamen bambae i jusumaot, wan, Presiden blong Kaonsel blong Olgeta Jif bambae i jusumaot, mo wan, olgeta Presiden blong ol Kaonsel blong Distrik bambae i jusumaot, nao Presiden blong Ripablik bambae i putumap trifala.


(5) Ol man we oli kasem mak blong kam loea long Nyuhebredis, olgeta ya nomo bambae oli save kam jaj blong Hae Kot. Sipos man i no kasem mak blong kam loea long Nyuhebredis, bambae hem i no save kam Hed Jaj, mo bambae i no save kam jaj long Hae Kot tu.


MAN WE I NO GLAD LONG TOK BLONG HAE KOT BAMBAE I SAVE ASKEM BLONG NARAFALA KOT I JAJEM TRABOL BLONG HEM BAKEGEN


48. Sipos man i gat trabol we i bigfala, we i go wantaem nomo long Hae Kot nao man i no glad long tok we Hae Kot i talem blong jajem trabol blong hem, nao i askem blong narafala kot i jajem trabol ya blong hem bakegen, bambae Palamen i stanemap wan Spesel Kot blong jajem trabol bakegen. Blong Spesel Kot ya i mekem wok blong hem, bambae i mas gat tu Jaj blong Hae Kot i stap long hem, we tufala bambae i wok wanples. Sipos man i gat trabol we narafala kot i jajem finis, be man i no glad long tok blong kot ya, nao Hae Kot i jajem trabol ya blong hem bakegen be hem i no glad long tok blong Hae Kot tu, nao i askem blong narafala kot i jajem trabol ya bakegen yet, bambae Palamen i save stanemap wan Spesel Kot olsem blong jajem trabol ya bakegen.


FASIN BLONG FAENEMAOTSTRET OL LOA BLONG KASTOM BLONG BIFO


49. Bambae Palamen i save mekem loa blong askem prapa rod blong faenemaotgud ol loa blong kastom blong bifo, we oli stap kasem laef blong Nyuhebredis yet. Mo bambae hem i save mekem rod blong man we i savegud ol kastom blong bifo, i sidaon wetem ol jaj long Hae Kot, no long Spesel Kot ya blong jajem bakegen ol trabol we Hae Kot i jajem finis, nao i joen long ol wok ya blong kot.


OL KOT LONG OL VELEJ MO LONG OL AELAN


50. Bambae Palamen i mekem ol loa blong stanemap ol kot long ol velej mo ol aelan, we bambae oli save jajem ol bisnes we i kamaot long ol kastom blong bifo, wetem sam narafala bisnes tu. Bambae Palamen i mekem rod blong ol jif oli wok long ol kot ya.


MAN WE I LUK SE NARAFALA MAN I MEKEM FASIN LONG HEM WE I NO STRET LONG KONSTITUSIN YA I SAVE ASKEM LONG HAE KOT BLONG I JAJEM POEN BLONG HEM


51. (1) Sipos wan man i luk se narafala man i mekem wan fasin long hem we i no stret long ol loa blong Konstitusin ya, bambae hem i save askem long Hae Kot blong i jajem poen ya blong hem. Sipos hem i mekem olsem, fasin ya bambae i no save blokem hem, se hem i no save folem ol narafala rod tu we Loa i letem, blong i stretem poen ya blong hem.


(2) Hae Kot bambae i gat paoa blong jajem ol bisnes olsem, mo bambae i gat paoa blong sanem tok blong hem i go long ol man, blong fosem olgeta blong oli folem ol loa blong Konstitusin ya.


(3) Sipos wan narafala kot i stap jajem wan bisnes, nao i gat kwestin i kamaot long mining blong wan loa blong Konstitusin ya, mo jaj long kot ya i luk se kwestin ya i kasem stampa blong ol Loa, bambae jaj ya i askem blong Hae Kot i lukluk kwestin ya, i givin ansa long hem.


OL POEN LONG BISNES BLONG ELEKSEN


52. Bambae Hae Kot nomo i gat paoa blong jajem ol poen we i kamaot long bisnes blong eleksen. Hae Kot ya nomo bambae i save talem we fasin we oli folem blong jusumaot man i kam memba blong Palamen, no blong Kaonsel blong Olgeta Jif, no blong Kaonsel blong Distrik, i stret no i no stret. Mo Hae Kot ya nomo bambae i save talem we memba olsem i aot long jea blong hem long stret fasin, no we wan samting i blokem hem, hem bambae i no moa save holem jea blong hem bakegen.


LOEA WE GAVMAN I PUTUM BLONG TALEMAOT OL TRABOL LONG KOT


53. Bambae Komiti blong Lukaot long ol Wok blong ol Jaj i jusumaot man blong i kam Loea we Gavman i Putum blong Talemaot ol Trabol long Kot, nao Presiden blong Ripablik bambae i putumap man ya long wok ya. Nao taem we polis i talem se man i brekem loa, olgeta wok blong toktok long kot from trabol ya i stap long han blong Loea ya we Gavman i Putum blong Talemaot ol Trabol long Kot. Sipos Loea ya we Gavman i Putum i stap mekem wok blong hem, bambae i no gat narafala man i save tok long hem from, no i save kam bos long hem, hem nomo bambae i bos long wok we i stap long han blong hem.


LOEA WE GAVMAN I PUTUM BLONG GIVHAN LONG OL MAN


54. Bambae Palamen i mekem loa blong stanemap wok blong man we nem blong hem, Loea we Gavman i Putum blong Givhan long ol Man. Bambae Komiti blong Lukaot long ol Wok blong ol Jaj i jusumaot man blong i tekem wok ya, mo Presiden blong Ripablik bambae i putumap hem long wok blong hem. Wok blong Loea ya, hem bambae i givhan long ol puaman, we oli no save pem loea, nao bambae i wok olsem loea blong olgeta.


JAPTA NAEN


OL WOK BLONG MEKEM OL TOK BLONG GAVMAN I STANAP


HAF NAMBA WAN


FASIN BLONG WOK BLONG OL MAN WE OLI STAP WOK BLONG GAVMAN


OL MAN BLONG WOK BLONG GAVMAN


55. (1) Ol man blong wok blong gavman bambae oli stap wok aninit long Konstitusin ya, mo aninit long han blong ol man Nyuhebredis, mo oltaem oli mas ona long Konstitusin mo oli mas ona long ol man Nyuhebredis.


(2) Bambae ol man ples blong Nyuhebredis nomo oli mekem wok blong gavman. Bambae i gat wan komiti we nem blong hem Komiti we i Lukaot long ol Man we oli stap Wok blong Gavman. Komiti ya bambae i makem ol narafala samting we man i mas gat blong i mekem wok blong gavman.


(3) Bambae i gat ol loa blong makem ol wok blong gavman we man i save mekem, mo sipos i no gat loa blong makem wok we bambae man i mekem, bambae hemi i no save kam mekem wok blong gavman.


(4) Sipos i gat wok blong gavman we i jes kamaot, we ol man blong gavman oli no tingbaot fastaem, nao i no gat man i stap blong i mekem, bambae Praeminista no Jeman blong Kaonsel blong Distrik i save brekem fasin wanwan taem nomo, blong mekem rod blong ol man blong gavman oli tekem man i kam blong taem we oli makem, blong i mekem wok ya. Sipos Komiti blong Lukaot long ol Man we oli stap Wok blong Gavman i wantem mekem rod blong man i statem wan wok kwiktaem, bambae hem i save toktok wetem Minista we i stap lukaot long mane mo Minista we i stap lukaot long ol wok blong gavman, nao sipos tufala minista ya i agri, bambae Komiti ya i save mekem sem fasin we Praeminista i save mekem.


(5) Sipos loa we i makem wok blong gavman we wan man i stap mekem i stap yet, bambae man we i stap mekem wok ya i save stap long wok ya. Sipos narafala man i wantem tekemaot hem long wok olsem, bambae i save mekem long ol fasin ya nomo we Konstitusin ya i talem.


(6) Ol man we oli stap wok blong gavman, bambae pei blong olgeta i stap go antap, olsem we ol loa blong Nyuhebredis i talem.


(7) Sipos man we i stap wok blong gavman i kasem we yia blong hem i naf blong i finis, bambae hem i finis long wok blong gavman. Sipos Komiti blong Lukaot long ol Man we oli stap Wok blong Gavman i wantem sakemaot man long wok blong gavman, bambae i save mekem olsem. Mo sipos bos blong wan man we i stap wok blong gavman i wantem blong man ya i tekem narafala wok we i daon long wok we man ya i stap long hem, be Komiti blong Lukaot long ol Man we oli stap Wok blong Gavman bambae i mas agri long fasin ya fastaem.


(8) Ol tok blong namba (5) ya antap bambae i no save blokem Palamen se hem i no save mekem loa blong fosem samfala man, blong oli finis long wok blong gavman we i no taem yet blong oli finis, blong letem sam nyufala man oli kam mekem wok blong gavman.


OL MAN WE OLI STAP GIVIM TOKTOK LONG PRAEMINISTA MO OL NARAFALA MINISTA, OLI NO GAT RAET BLONG HOLEM WOK BLONG OLGETA. PRAEMINISTA I SAVE MUVUM SAMFALA MAN BLONG WOK BLONG GAVMAN OLI GO LONG NARAFALA WOK


56. (1) Ol tok blong namba 55 long paragraph (5) antap, bambae hem i no blong talemaot fasin blong wok blong ol man blong ol pati blong politik, we oli stap givim tok long Praeminista, mo ol Minista.


(2) Bambae Praeminista i gat paoa blong seftem ol hae man long wok blong gavman, oli aot long wok we oli stap long hem, oli go long narafala wok we i hae sem mak long wok ya we oli stap long hem fastaem.


OL MEMBA BLONG KOMITI YA BLONG LUKAOT LONG OL MAN WE OLI STAP WOK BLONG GAVMAN


57. (1) Komiti ya blong Lukaot long ol Man we oli stap wok blong Gavman, bambae i gat faef memba blong hem. Presiden blong Ripablik bambae i go toktok wetem Praeminista fastaem blong jusumaot ol faef man ya, nao biaen bambae hem i putumap olgeta, mo bambae oli holem wok ya blong tri ya.


(2) Evri yia, Presiden blong Ripablik ya bambae i jusumaot wan long ol memba blong Komiti ya blong i Jeman blong hem, mo bambae i putumap hem. Jeman ya bambae i lukaot long ol wok blong mekem ol miting blong Komiti ya.


(3) Sipos wan man i memba blong Palamen, no i memba blong Kaonsel blong Olgeta Jif, no i memba blong wan Kaonsel blong Distrik, no i wan haeman long pati blong politik, hem bambae i no save kam memba blong Komiti ya.


(4) Sipos man we i memba blong Komiti ya i mekem wan fasin no wan samting we sipos i bin mekem fastaem, bambae oli no save putum hem i kam memba blong Komiti ya, ale, hem bambae i finis long Komiti ya from we i mekem olsem.


WOL BLONG KIMITI YA BLONG LUKAOT LONG OL MAN WE OLI STAP WOK BLONG GAVMAN


58. (1) Komiti ya blong Lukaot long ol Man we oli stap Wok blong Gavman, hem bambae i putum ol man we oli mekem ol wok blong gavman, mo hem bambae i tekemaot olgeta long wok we oli stap mekem, blong oli go long narafala wok we i moa hae. Mo komiti ya bambae i jusumaot ol man we bambae oli tekem trening long ol kos long Nyuhebredis mo ovasi, blong oli mekem ol wok blong gavman. Sipos Komiti i wantem mekem olsem, bambae hem i save mekem ol eksam blong jusumaot ol man blong tekem trening olsem.


(2) Sipos man we i mekem wok blong gavman i no folemgud ol rul blong wok blong hem, bambae Komiti ya i lukluk bisnes ya, nao bambae i stretem man ya, no i sakemaot hem long wok blong hem.


(3) Komiti ya bambae i no save lukaot long ol jaj mo ol soldia mo ol polis mo ol man we oli stap wok long saed blong edukesen, bambae i no gat paoa long olgeta ya.


(4) Sipos Komiti ya i stap mekem wok blong hem, bambae i no gat narafala man i save tok long hem from, no i save kam bos blong hem, hem nomo bambae i bos long ol wok we i stap long han blong hem.


HAF MAMBA TU


OMBAJMAN


MAN BLONG LUKLUK FASTAEM OL POEN WE OL MAN PLES OLI GAT LONG GAVMAN


59. (1) Bambae i gat wan man i stap we nem blong hem Ombajman. Presiden blong Ripablik bambae i toktok wetem Praeminista, mo Jeman blong Palamen, mo ol lida blong ol pati blong politik we oli gat memba long Palamen, mo Jeman blong Kaonsel blong Olgeta Jif, mo ol Jeman blong ol Kaonsel blong Distrik, mo Jeman blong Komiti blong lukaot long ol Man we oli stap Wok blong Gavman, mo Jeman blong Komiti blong Lukaot long ol Wok blong ol Jaj, blong jusumaot man blong wok ya, nao bambae i putumap hem, mo bambae hem i holem wok ya blong faef yia.


(2) Sipos wan man i memba blong Palamen, no i memba blong Kaonsel blong Olgeta Jif, no i memba blong wan Kaonsel blong Distrik, no i stap mekem narafala wok blong gavman, no i wan haeman blong pati blong politik, hem bambae i no save kam Ombajman.


(3) Sipos man we i Ombajman i mekem wan fasin no wan samting, we sipos i bin mekem fastaem, bambae oli no save putum hem i kam Ombajman, ale, hem bambae i finis long Ombajman from we i mekem olsem.


OL SAMTING WE OBAJMAN I SAVE LUKLUK


60. (2) Ol man ya we Ombajman ya i gat raet blong lukluk ol samting we oli mekem, hemia olgeta man we oli stap wok blong gavman, wetem olgeta grup mo kampani we gavman i stanemap blong mekem ol wok blong hem, mo ol ofis blong olgeta minista. Ol samting we Presiden blong Ripablik i mekem, mo we Komiti blong Lukaot long ol Wok blong ol Jaj i mekem, mo we Hae Kot i mekem, mo we ol grup mo kampani we oli stap wok olsem jaj i mekem, ol samting ya nomo Ombajman i no gat raet blong lukluk olgeta.


(1) Ombajman ya bambae i gat raet blong lukluk ol samting we ol man ya oli mekem, we nem blong olgeta i stap long paragraf (2) ya antap.


(a) Sipos wan man i luk se wan long olgeta ya i mekem wan fasin long hem we i no stret, nao hem i askem blong Ombajman i lukluk poen blong hem, ale, bambae Ombajman i gat raet blong lukluk olgeta samting we man ya blong gavman i mekem. No sipos man ya we i gat poen long man blong gavman i no save talemaot poen blong hem long Ombajman, be wan famle blong hem no wan narafala man i talemaot long nem blong hem, bambae Ombajman ya i save lukluk poen ya blong hem.


(b) Sipos wan Minista, no wan memba blong Palamen, no wan memba blong Kaonsel blong Olgeta Jif, no wan memba blong wan Kaonsel blong Distrik i askem blong Ombajman i lukluk wan samting we wan long ol man ya i mekem, bambae Ombajman ya i gat raet blong mekem olsem.


(c) Mo sipos Ombajman hem wan i ting se i gud hem i lukluk samting we wan long ol man ya i mekem, bambae hem i gat raet blong mekem olsem.


(3) Ombajman ya bambae i gat paoa blong toktok wetem ol Minista, mo ol man we oli stap wok blong gavman, mo ol man we oli stap wok blong mekem ol tok blong gavman i stanap, mo ol grup mo kampani we gavman i stanemap olgeta, mo ol narafala man we maet oli save givhan long hem. Bambae Ombajman ya i save talem long olgeta blong oli givhan long hem long wok blong hem, mo blong oli givim ansa long olgeta kwestin blong hem, mo blong oli givim long hem olgeta pepa we hem i wantem luk, from we i stap lukluk wan poen olsem.


(4) Sipos wan man i kam talemaot poen we hem i gat long wan man blong gavman no wan kampani blong wok blong gavman, long Ombajman, bambae Ombajmsn ya i letem man ya blong gavman no kampani ya blong gavman i talemaot ol tok blong hem from poen ya we man i gat long olgeta.


(5) Bambae Ombajman i mekem ol wok blong hem, long fasin ya we narafala man we i no gat raet blong luk long hem i no save luk.


OL SAMTING WE OMBAJMAN I FAENEMAOT MO OL RIPOT BLONG HEM


61. (1) Sipos Ombajman i luklukgud long poen we man i talem long hem, nao i faenemaot we poen ya i no tru, bambae hem i talemaot olsem long man ya we i talem long hem, mo bambae i talemaot olsem long Praeminista mo long hed blong dipatmen blong gavman no kampani blong gavman we man ya i bin tok agens long hem fastaem.


(2) Sipos Ombajman i luklukgud long poen we man i talem long hem, nao i faenemaot we poen blong hem i tru, bambae hem i talemaot ol samting we i faenemaot long Praeminista mo long hed blong kampani blong gavman no dipatmen blong gavman we man i bin tok agens long hem fastaem. Sipos Ombajman ya i faenemaot man blong gavman i mekem wan fasin no wan samting we i brekem loa,


no i no savegud ol Loa blong Nyuhebredis,

no i no savegud ol bisnes blong samting we i mekem,

no i tektaem tumas blo mekem wok blong hem we i no stret blong tektaem olsem,

no i mekem i no stret long man ya,

no i mekem krangke wok nomo long hem,
nao from ol samting ya, hem i luk se i gud

we gavman i tekemaot tok we man ya, blong hem i talem fastaem,

no gavman i jenisim tok ya blong hem,

no gavman i jenisim fasin blong wok we man blo hem i stap folem,
bambae hem i save talemaot ol samting ya long ripot ya blong hem.


(3) Sipos Ombajman ya i no blokem ripot blong hem se i blong Praeminista nomo wetem hed blong kampani blong gavman we man i bin tok agens long hem fastaem, from we i nogud blong talem long ol man mo i no stret blong talemaot long ol man, mo i no blokem samfala tok blong ripot blong hem long fasin ya, bambae i fri blong olgeta man oli save ridim ripot ya. Mo nating we Ombajman bambae i blokem ripot blong hem blong ol narafala man oli no ridim, be bambae i no save blokem long man ya we i bin talemaot poen ya long hem fastaem, bambae i talemaot long hem ol samting we hem i faenemaot.


(4) Taem Praeminista wetem hed blong kampani blong gavman we man i bin tok agens long hem fastaem, tufala i harem ol samting ya we Ombajman i faenemaot, bambae tufala i no tektaem, bambae wan long tufala i talemaot fasin we hem i luk se i stret blong mekem from ol samting ya. Mo wantaem nomo bambae hem i talemaot tok ya blong hem wetem ol tingting blong hem, i go long man we i bin talemaot poen blong hem fastaem. Mo samtaem bambae i gat loa we i mekem taem blong man olsem, se sipos hem i stap nating go kasem en blong taem ya, we i no mekem ol samting we i gat raet blong mekem blong stretem bisnes blong hem, biaen bambae i no moa save mekem. Sipos i gat loa olsem, taem ya we loa i mekem bambae i save stat long taem we man ya we i bin talemaot poen blong hem fastaem, i kasem tok ya blong gavman wetem tingting blong hem.


(5) Evri yia, bambae Ombajman i mekem ripot long Palamen long ol wok blong hem, mo sipos i luk se i gud blong mekem ol narafala ripot bakegen long ol samting we i stap faenemaot, no long ol fasin we ol man oli stap mekem blong stretem ol samting ya, bambae i save mekem olsem. Mo sipos Ombajman i wantem askem blong Palamen i luklukgud long samfala fasin we ol man we oli stap wok blong gavman oli stap folem, we hem i luk se i no beswan, bambae i save mekem samting ya tu.


OL MAN PLES OLI GAT RAET SE OLTAEM OL MAN WE OLI STAP WOK BLONG GAVMAN BAMBAE OLI TOKTOK LONG OL MAN LONG LANWIS WE OLI SAVEGUD


62. (1) Ol man we oli stap wok blong gavman bambae oli save mekem olgeta bisness blong olgeta wetem ol man ples, long trifala lanwis blong wok blong Ripablik blong Nyuhebredis, nao man ples bambae i save talem long olgeta blong oli toktok wetem hem long wan long trifala lanwis ya we hem i savegud.


(2) Sipos wan man ples i ting se man blong gavman i no folem tok blong paragraf (1) antap, i mekem narafala fasin long hem, man ples ya bambae i save talemaot bisnes ya long Ombajman, nao Ombajman bambae i lukluk samting ya, olsem we ol tok blong namba 60 mo 61 antap i talem.


(3) Evri yia, bambae Ombajman i mekem spesel ripot long Palamen long fasin we ol man oli stap yusum trifala lanwis ya wetem ol narafala lanwis tu long Nyuhebredis. Long ripot ya, bambae Ombajman ya i save tokbaot ol fasin we i save mekem ol man bambae oli onagud long olgeta lanwis blong Nyuhebredis, mo bambae oli stap holem olgeta.


OMBAJMAN NOMO I BOS BLONG WOK BLONG HEM


63. Sipos Ombajman i stap mekem wok blong hem, bambae i no gat man i save tok long hem from, no i save kam bos blong hem, hem nomo bambae i bos long wok we i stap long han blong hem.


JAPTA TEN


OLGETA WE OLI LIDA


FASIN WE BAMBAE OL LIDA BLONG KANTRI OLI FOLEM


65. Ol lida we japta ya i tokbaot, i gat Presiden blong Repablik, mo Praeminista, mo ol Minista, mo ol memba blong Palamen, mo samfala hae man long ol man we oli stap wok blong gavman we Loa i makem olgeta.


FASIN BLONG OL MAN WE OLI LIDA


64. (1) Man we i lida, olsem we tok blong namba 65 i talem, hem bambae i man we long wok blong hem long gavman, mo long laef blong hem long ples blong hem, fasin blong hem i stred gud.


(a) Man we i lida bambae i no mekem fasin ya we wok blong gavman we i stap long han blong hem, mo bisnes we i blong hem nomo, we hem i stap win long hem, tufala i meksap. Bambae hem i no mekem wan fasin we bambae i save mekem ol man oli ting se hem i stap win long bisnes blong hem, from wok blong gavman we i stap long han blong hem.


(b) Man we i lida bambae i no mekem wan fasin we bambae i save mekem ol man oli 1ukluknogud long haenem we hem i holem, no wok we hem i stap mekem.


(c) Man we i lida bambae i no mekem wan fasin we bambae i save mekem ol man oli ting se hem i save wok long tu tingting.


(d) Man we i lida bambae i no mekem wan fasin we bambae i save mekem ol man oli no moa tinghae long Gavman blong Ripablik blong Nyuhebredis, no oli no moa ona long Gavman ya, no oli no moa trastem Gavman ya, oli ting se hem i save wok long tu tingting.


(2) Bakegen, man we i lida bambae i no save yusum haenem blong hem blong mekem ol bisness we i blong hem nomo. Bambae hem i no save joen long wan kampani, no long wan narafala bisness olsem, sipos fasin ya bambae i save mekem ol man bambae oli no moa bilif se hem i stap mekem ol wok blong hem long prapa fasin, olsem we paragraph (1) i talem. Wok blong gavman we i stap long han blong hem, bambae i mas stap hem wan, mo bisnes we i blong hem nomo, we hem i stap win long hem, bambae i mas stap hem wan.


PALAMEN BAMBAE I MEKEM LOA FROM OL FASIN YA


66. Bambae Palamen i mekem loa blong mekem rod blong mekem ol tok ya blong Japta Ten i stanap.


JAPTA LEVEN


PAOA BLONG LUKAOT LONG KANTRI LONG BIGFALA TAEM BLONG TRABOL


OL SPESEL LOA BLONG BIGFALA TAEM BLONG TRABOL


67. Long samfala taem blong trabol, bambae Kaonsel blong ol Minista nomo i gat paoa blong mekem ol spesel loa blong taem ya, we i no wet blong Palamen i agri long ol loa ya.


(a) Sipos Ripablik blong Nyuhebredis i stap mekem faet long narafala kantri, bambae Kaonsel blong ol Minista i gat paoa blong mekem ol spesel loa olsem.


(b) Sipos Kaonsel blong ol Minista i agri se i mas gat paoa olsem, from we i gat wan bigfala trabol olsem hariken no graon i seksek, we i spolem ples tumas, no from we ol man oli stap faet, ples i no moa stap kwaet, no from we sipos gavman i no blokem ol man, bambae olgeta oli save faet, Kaonsel ya i save toktok wetem Presiden blong Ripablik, nao Presiden ya bambae i talemaot we i gat bigfala taem blong trabol olsem. Mo taem Presiden ya i talemaot olsem, bambae Kaonsel blong ol Minista i gat paoa blong putum ol spesel loa olsem.


FASIN WE SPESEL PAOA YA BLONG MEKEM LOA BAMBAE I FINIS, MO FASIN WE OLI SAVE MEKEM I STAP KAM NYUWAN BAKEGEN


68. (1) Sipos Palamen i stap miting, nao i gat wan trabol, mo Presiden blong Ripablik i talemaot we i gat bigfala taem blong trabol i stap, olsem we tok blong namba 67 antap i talem, be Palamen i no agri long tok ya, Kaonsel blong ol Minista bambae i holem spesel paoa ya blong mekem loa, blong seven dei nomo. Be sipos Palamen i wantem agri blong Kaonsel ya i holem paoa olsem, bambae plante memba oli mas agri long tok ya. Sipos i gat tri memba blong Palamen, bambae tu i mas agri, sipos i gat tri memba blong Palamen, bambae tu i mas agri.


(2) Sipos Palamen i no stap miting, nao Presiden blong Ripablik i talemaot we i gat bigfala taem blong trabol olsem i stap, Kaonsel blong ol Minista bambae i holem spesel paoa ya blong mekem loa, blong fotin dei.


(3) Sipos Palamen i stap miting, nao i vot olsem we paragraph (1) i talem, nao i agri blong Kaonsel blong ol Minista i holem spesel paoa olsem, bambae Kaonsel ya i save holem paoa ya, go kasem taem we Palamen i makem. Be Palamen bambae i no save putum wan loa se Kaonsel ya bambae i holem paoa olsem, i go bitim tri manis. Sipos tri manis i pas, nao Palamen i wantem Kaonsel ya bambae i holem paoa ya yet, bambae i mas agri long hem bakegen.


(4) Sipos Presiden blong Ripablik i talemaot we i gat bigala taem blong trabol olsem i stap, tok ya bambae i no blokem Palamen, se hem i no save mekem miting. Nating we tok ya stap, be Palamen bambae i save mekem miting blong hem olsem we hem i talemaot se bambae i mekem.


(5) Sipos Presiden blong Ripablik i talemaot we i gat bigfala taem blong trabol olsem i stap, tok ya bambae i blokem Palamen se hem i no save talem se hem bambae i finis long wok blong hem, nao bambae i gat eleksen bakegen, olsem we namba 26, paragraph (2) mo paragraph (3) i talem. Be sipos Presiden blong Ripablik i talemaot we i gat bigfala taem blong trabol i stap, nao Palamen i finis long wok blong hem, from we taem blong wok blong hem i finis olsem we namba 26 paragraf (1) i talem, bambae Palamen i save mekem miting bakegen, be blong tokbaot bigfala taem blong trabol ya nomo. Mo loa ya bambae i holem Palamen ya i stap olsem gogo i gat eleksen, nao nyufala Palamen i mekem fas miting blong hem.


(6) Sipos Presiden blong Ripablik i talemaot we i gat spesel hadtaem i stap, be oltaem Palamen i save agri blong tekemaot tok ya bakegen. Be blong mekem olsem, namba blong ol memba blong Palamen we bambae oli agri long tok ya i mas moa long stret haf blong ol memba blong Palamen.


OL SAMTING WE OL SPESEL LOA WE OLI MEKEM LONG BIGFALA TAEM BLONG TRABOL OLSEM OLI SAVE TALEM


69. (2) Ol loa ya we Kaonsel blong ol Minista bambae i save mekem long fasin ya we namba 67 i talem, bambae oli loa we plante man oli save agri se kantri ya i mas gat blong holem laef blong ol man long taem ya. Mo ol loa ya, bambae oli loa we Kaonsel ya i save soemaot se i stret blong i mekem long kantri ya we i holem fasin ya we olgeta man i holem paoa blong gavman.


(1) Nating we i gat narafala tok long haf namba wan blong Japta Tu blong Konstitusin ya, sipos ol loa ya we Kaonsel blong ol Minista bambae i mekem long bigfala taem blong trabol, long fasin ya we namba 67 i talem, oli folem ol tok ya we paragraph (2) ya antap i talem, bambae oli stanap.


(a) Be Kaonsel blong ol Minista ya bambae i no save mekem loa we i slakemdaon tok ya long Japta Tu long Konstitusin ya, we i talem se olgeta man oli gat raet blong stap laef, i no gat man i gat raet blong mekem i strong long narafala man, olsem we man ya i anamol nomo, mo i no gat man i gat raet blong fosem narafala man blong i wok blong hem.


(b) Mo Kaonsel ya bambae i no save mekem loa we i letem polis i holem man i stap long kalabus gogo i moa long wan manis, we oli no tekem hem i gao long kot fastaem. Man afsaed se i blong wan kantri we i stap faet long Nyuhebredis, hemia nomo polis i save holem i stap long kalabus olsem.


MAN WE I TING SE WAN LOA OLSEM I NO STRET I SAVE ASKEM BLONG HAE KOT I JAJEM LOA YA


70. Sipos wan man ples i ting se wan loa we Kaonsel blong ol Minista i mekem long fasin ya we namba 67 i talem i no stret, bambae i gat raet blong talemaot we loa olsem bambae i stanap no i no stanap, mo bambae i save jajem olgeta loa ya wantaem, mo i save jajem olgeta wanwan.


JAPTA TWELEF


TOK BLONG GRAON


GRAON I BLONG YUMI, OL KASTOMONA BLONG HEM


71. Olgeta graon long Ripablik blong Nyuhebredis i blong yumi wetem ol pikinini blong yumi, we yumi ol kastomona blong hem.


FASIN BLONG HOLEM GRAON MO BLONG YUSUM GRAON


72. Fasin blong holem graon long Ripablik blong Nyuhebredis, mo blong yusum graon ya, bambae i folem fasin we loa blong kastom blong bifo i putum.


MAN WE BAMBAE I HOLEM GRAON OLWE


73. Bambae i no olgeta man we oli save holem graon long Ripablik blong Nyuhebredis, ol man ples we oli kasem graon blong olgeta long wan fasin blong holem graon we Gavman blong Ripablik ya i talem se i stret, olgeta ya nomo bambae oli save holem graon blong olgeta olwe.


KANTRI BAMBAE I GAT LOA BLONG GRAON


74. Palamen bambae i toktok wetem Kaonsel blong olgeta Jif, nao biaen bambae i mekem loa blong ol graon long kantri ya, blong i mekem rod blong ol tok ya long namba 71 mo namba 72 mo namba 73 i stanap. Mo bambae Palamen i save mekem ol narafala loa blong ol narafala graon, nao graon we taon i stap long hem bambae i gat loa blong hem we i narafala.


FASIN BLONG PEM MAN WE I BIN YUSUM GRAON WE I NO BLONG HEM


75. From ol tok blong japta ya, bambae i gat ol man we bambae oli finis long graon we oli bin yusum, blong graon ya bambae i kambak long ol kastomona blong hem. Nao from samting ya, bambae Palamen i mekem loa blong makem fasin blong skelem mane we ol man ya bambae oli kasem from we oli lus olsem, mo fasin blong pem mane ya blong olgeta.


OL RAO FROM GRAON


76. (1) Sipos i gat graon we netif i talem se i blong hem, be narafala man i stap yusum, nao i gat rao from graon ya from ol tok blong japta ya, bambae Gavman i holem graon ya gogo kasem we oli stretem rao ya.


(2) Gavman blong Nyuhebredis bambae i mekem rod blong stretem ol rao blong ol kastomona from ol graon blong olgeta, long fasin we i folem ol loa blong kastom wetem ol fasin blong hem.


BISNES BLONG SALEM GRAON MO BLONG PEM GRAON


77. (1) Nating we tok blong namba 71 mo namba 72 mo namba 73 i stap, be sipos wan man ples we i netif blong Nyuhebredis i wantem mekem bisnes blong graon wetem man ples we i no netif blong Nyuhebredis, no wetem man we i no man ples blong Nyuhebredis, be Gavman blong Nyuhebredis bambae lukluk bisnes ya fastaem, i agri long hem. Sipos Gavman ya i no save agri long hem, bambae bisnes ya i no save gohed.


(2) Oltaem Gavman bambae i agri long bisnes ya blong graon, we tok blong hem i stap long paragraf (1).


(a) Be sipos bisnes ya i save spolem ol kastomona blong graon ya,


(b) no i save spolem man ples we i no kastomona blong graon ya,


(c) no i save spolem ol man ples blong ples ya we graon i stap long hem,


(d) no i save spolem Ripablik blong Nyuhebredis long sam fasin, bambae Gavman i no save agri long hem.


GAVMAN I SAVE HOLEM GRAON


78. Nating we tok ya blong namba 73 mo namba 72 i stap, be bambae Gavman i save holem graon we i pemaot finis blong yusum blong givhan long olgeta man, mo bambae i save pem graon bakegen blong yusum olsem.


GAVMAN I SAVE SERAOT GRAON LONG OL MAN WE OLI SOT LONG GRAON


79. (1) Nating we tok ya blong namba 71 mo namba 72 i stap, be bambae Gavman i save pemaot graon long ol kastomona blong hem, blong givim i go long ol netif we oli sot long graon, i blong olgeta. Mo i save givim olsem long ol netif wanwan, no long ol netif blong wan ples we oli no moa gat graon blong olgeta.


(2) Sipos Gavman i wantem pemaot graon long sam man blong givim i go long sam narafala man long fasin we paragraf (1) i talem, bambae hemi i tingtinggud long fasin we tufala kampani ya bambae i stap wanples. Bambae hem i tingbaot laen blong tufala, mo lanwis blong tufala, mo kastom blong tufala, mo ples we tufala i stap long hem fastaem, blong makem we bambae tufala i save joengud.


JAPTA TATIN


OL GAVMAN BLONG OL DISTRIK BLONG NYUHEBREDIS


LOA BLONG STANEMAP OL GAVMAN LONG OL DISTRIK BLONG NYUHEBREDIS


80. Gavman blong Ripablik blong Nyuhebredis i luksave finis se sipos i no gat ol gavman blong ol Distrik olbtaot long Nyuhebredis, bambae ol man ples oli no save joengud long ol bisnes blong gavman long ol distrik ya. Nao from samting ya, bambae Palamen i mekem ol loa blong stanemap ol gavman olsem.


OL KAONSEL BLONG DISTRIK


81. (1) Bambae ol man ples long ol Distrik wanwan oli save jusumaot ol memba blong Kaonsel blong Distrik blong olgeta, long fasin we Loa bambae i talemaot, mo insaed long ol Kaonsel ya, bambae i gat ol memba blong ol kastom jif tu i stap.


(2) Sipos ol man ples oli jusumaot ol memba blong Kaonsel blong Distrik blong olgeta, bambae ol memba ya oli save mekem toktok wetem Kampani ya long Palamen we i Holem Gavman, blong Kampani ya i save mekemrere ol loa blong mekem rod blong Kaonsel ya i wok.


(3) Ol loa ya we tok blong hem i kamaot long paragraph (2) antap, bambae Kampani ya we i Holem Gavman i tekem i go long Palamen, blong ol memba oli luk long hem, oli vot long hem. Sipos Palamen i wantem agri long ol toktok olsem, bambae plante memba oli mas agri long hem. Sipos i gat tri memba blong Palamen, bambae tu i mas agri long hem, sipos i gat tri memba blong Palamen, bambae tu i mas agri long hem.


JAPTA FOTIN


FASIN BLONG JENISIM TOKTOK BLONG KONSTITUSIN


TOK BLONG JENISIM SAM TOKTOK BLONG KONSTITUSIN YA


82. Bambae Praeminista, no memba blong Palamen i save putum mosen long Palamen blong jenisim sam toktok blong Konstitusin ya.


FASIN WE BAMBAE PALAMEN I WOK LONG HEM BLONG JENISIM TOKTOK BLONG KONSTITUSIN


83. Sipos memba blong Palamen i wantem jenisim sam toktok blong Konstitusin ya, bambae Palamen i mekem spesel miting we plante memba blong hem bambae oli stap insaed. Sipos i gat fo memba blong Palamen, bambae tri memba i mas stap long miting, sipos i gat fo memba, bambae tri memba i mas stap long miting. Be sipos oli no plante olsem long fas miting, taem wan wik i pas, bambae Palamen i save mekem miting bakegen blong tokbaot bisnes ya. Nao sipos i gat tri memba blong Palamen, bambae tu memba i mas stap long miting ya, sipos i gat tri memba blong Palamen, bambae tu memba i mas stap long miting. Mo sipos oli vot from bisnes olsem, nating we fas miting no seken miting, be bambae i mas gat plante memba oli agri long hem blong tok i stanap. Sipos i gat tri memba blong Palamen, bambae tu i mas agri long hem, sipos i gat tri memba blong Palamen, bambae tu i mas agri long hem.


BLONG JENISIM SAMFALA TOK BLONG KONSTITUSIN YA, BAMBAE OL MAN PLES OLI MAS MEKEM REFRENDOM FROM FASTAEM, BLONG SOEMAOT TINGTING BLONG OLGETA


84. Bambae Palamen i save jenisim plante toktok blong Konstitusin ya, olsem we tok blong namba 83 antap i talem. Be sipos hem i wantem mekem toktok olsem blong jenisim tok blong Konstitusin ya,

long fasin blong yusum trifala lanwis ya Bislama, mo Inglis, mo Franis, long kantri ya,

no long fasin blong mekem eleksen,

no long fasin blong stanemap ol Kaonsel blong Distrik,

no long paoa we ol Kaonsel ya bambae oli gat,

no long fasin we Palamen bambae i wok,
be ol man ples bambae oli mas soemaot long refrendom, we oli agri long toktok ya blong Palamen, nao toktok ya bambae i stanap.


JAPTA FEFTIN


TAEM WE REPRESENTATIF ASEMBLI BAMBAE I FINIS


NAO GAVMAN BLONG RIPABLIK BLONG NYUHEBREDIS BAMBAE I STANAP


FAS PRESIDEN BLONG RIPABLIK


85. Nating we tok blong Japta Sikis i stap, be fasin blong jusumaot fas Presiden blong Ripablik bambae i narafala.


(a) Bambae i gat Spesel Komiti blong Jusumaot Fas Presiden blong Ripablik. Ol memba blong Komiti ya, bambae i gat ol memba blong Representatif Asembli wetem ol Jeman blong ol Kaonsel blong Distrik we oli stanap finis long taem ya. Nao taem we Nyuhebredis i no independen yet, Spesel Komiti ya bambae i mekem miting blong jusumaot Presiden ya.


(b) Nao long dei we Nyuhebredis bambae i kam independen, man ya bambae i tekem wok blong Presiden, mo hem bambae i wok folem ol tok blong Konstitusin ya.


FAS PRAEMINISTA MO OL FAS MINISTA


86. Wan we i Jif Minista wetem olgeta we oli Minista long dei bifo long dei ya we bambae Nyuhebredis i independen, long dei ya we Nyuhebredis bambae i kam independen, bambae Jif Minista i kam Praeminista blong Ripablik blong Nyuhebredis mo ol Minista bambae oli kam ol Minista blong Ripablik ya. Mo bambae oli holem wok ya blong olgeta, olsem we oli tekem long rod ya we ol tok blong Japta Seven i talem.


FAS PALAMEN


87. (1) Man we long dei bifo long dei ya we bambae Nyuhebredis i independen oli memba blong Representatif Asembli, long dei we bambae Nyuhebredis i kam independen, bambae olgeta oli kam memba blong Palamen. Mo bambae oli holem wok blong olgeta long Palamen, olsem we ol tok blong Konstitusin ya i talem.


(2) Man we long dei bifo long dei ya we bambae Nyuhebredis i independen, hem i Jeman blong Representatif Asembli, long dei ya we bambae Nyuhebredis i kam independen, hem bambae i wok olsem Jeman blong Palamen, gogo kasem ol memba blong Palamen oli jusumaot man blong holem wok ya.


(3) Ol rul we Representatif Asembli i stap folem blong mekem wok blong hem long dei bifo long dei ya we bambae Nyuhebredis i independen, long dei ya we Nyuhebredis bambae i kam independen, Palamen bambae i folem ol rul ya gogo kasem we hem i jenisim olgeta lelebet blong mekem oli stret long fasin blong hem, no i mekem ol nyufala rul blong jenisim olgeta, olsem we tok blong namba 19 paragraf (5) i talem. Be bambae Palamen i tekem mining blong ol olfala rul ya we i stret gud wetem ol tok blong Konstitusin ya.


(4) Palamen bambae i wok gogo i finis long 1983, long November namba 14. Be sipos i gat samting i mekem Palamen i finis long wok blong hem fastaem, i no kasem dei ya, bambae hem i save finis, olsem we Konstitusin i talem.


OL MAN WE OL STAP WOK BLONG GAVMAN


88. (1) Sipos i no gat narafala tok long Konstitusin ya, man we long dei bifo long dei ya we bambae Nyuhebredis i independen, hem i stap holem wan wok long Gavman, long dei ya we Nyuhebredis bambae i kam independen, hem bambae i holem wok ya. Mo man we fastaem i stap mekem wan wok insaed long Gavman, from we man blong wok ya i no gat, biaen bambae i stap mekem sem wok ya. Be sipos tok blong Konstitusin ya i jenisim wok blong ol man olsem no fasin blong wok blong olgeta, bambae oli wok folem tok blong Konstitusin ya, be pei blong olgeta wetem ol narafala samting blong wok blong olgeta, bambae oli stap sem mak fastaem olsem bifo.


(2) Paragraf (1) antap bambae i no save blokem paoa blong Palamen blong talemaot se ol man we oli stap wok blong Gavman we oli no man ples blong Nyuhebredis, bambae oli mas finis long wok blong olgeta, blong letem ol man ples oli mekem ol wok ya.


(3) Nating we tok blong namba 55 paragraf (2) i talem i narafala, be sipos ol man ples blong Nyuhebredis oli no naf yet blong holem wan wok insaed long ol wok blong gavman, Gavman i save putum man we i no man ples blong Nyuhebredis blong i mekem wok ya, be blong smol taem nomo gogo kasem taem we Gavman i mekem, taem i putum hem long wok ya. Be taem Gavman i putum man we i no man ples blong Nyuhebredis i kam Jaj blong Hae Kot, bambae i no makem taem we bambae hem i finis.


OL JAJ BLONG HAE KOT


89. Nating we i gat ol narafala, tok blong hem long Japta Eit blong Konstitusin ya, be ol man we long dei bifo long dei ya we bambae Nyuhebredis i independen, oli jaj long Hae Kot we i stap long taem ya, no oli jaj long ol Kot blong Distrik we oli stap long taem ya, long dei ya we Nyuhebredis bambae i kam independen, bambae olgeta oli stap mekem wok blong jaj blong Hae Kot blong Ripablik blong Nyuhebredis, gogo Presiden blong Ripablik bambae i putumap ol jaj blong oli mekem ol wok ya, olsem we Japta Eit ya i talem. Mo sipos Presiden blong Ripablik i wantem putumap wan long ol jaj ya, blong i holem wok blong Hed Jaj go kasem we bambae i putumap Hed Jaj olsem we Japta Eit ya i talem, bambae hem i save mekem olsem.


OLGETA SAMTING WE NYUHEBREDIS GAVMAN I GAT RAET BLONG MEKEM, NO I AGRI BLONG MEKEM, NO I PROMES BLONG MEKEM


90. (1) Long dei ya we Nyuhebredis bambae i kam independen, olgeta samting we fastaem Nyuhebredis Gavman i gat raet blong mekem, bambae i kam olgeta samting we Gavman blong Ripablik blong Nyuhebredis i gat raet blong mekem. Long dei ya, olgeta samting we fastaem Nyuhebredis Gavman i agri blong mekem, bambae i kam olgeta samting we Gavman blong Ripablik ya i agri blong mekem, mo olgeta samting we Nyuhebredis Gavman i promes blong mekem, bambae i kam olgeta samting we Gavman blong Ripablik ya i promes blong mekem. Nating we ol samting ya oli kamaot from we Nyuhebredis Gavman fastaem i mekem promes wetem narafala gavman, no narafala man, no ol samting ya oli kamaot long narafala rod olgeta, be bambae olgeta evriwan oli samting blong Gavman blong Ripablik blong Nyuhebredis.


(2) Nating we tok blong paragraf (1) antap i stap, be sipos Gavman blong Ripablik blong Nyuhebredis i wantem go toktok bakegen wetem olgeta we oli givim raet finis long Nyuhebredis Gavman, mo olgeta we Nyuhebredis Gavman i mekem promes wetem olgeta, mo olgeta we Nyuhebredis Gavman i mekem promes long olgeta, blong traem blong jenisim tok ya we Nyuhebredis Gavman i talem fastaem, bambae i save mekem olsem.


FASIN BLONG MEKEM ELEKSEN


91. Taem tufalu gavman long Inglan mo Franis, tufala i givgivim leta long tufala finis blong stanemap ol tok blong namba 91 ya blong Konstitusin, mo i gat eleksen finis blong jusumaot ol memba blong Representatif Asembli, nyufala Representatif Asembli ya bambae i putumap wan Komiti blong i lukuk fasin blong mekem eleksen, blong i save givim tok long Palamen long sam nyufala fasin blong mekem eleksen. Ol tok blong Komiti ya i mas stret gud wetem tok we i stap long Konstitusin ya long namba 17 paragraf (1). Long ol memba blong Komiti ya, bambae i gat sem namba i kamaot wanwan long ol grup blong politik.


Palamen bambae i joenem ol tok blong Komiti ya long loa we bambae i mekem blong stanemap nyufala fasin blong mekem eleksen. Palamen bambae i mekem spesel miting blong tokbaot bisnes ya, mo bambae plante memba i mas stap insaed blong miting ya i gohed. Sipos i gat fo memba blong Palamen, bambae tri i mas stap insaed, sipos i gat fo memba blong Palamen, bambae tri i mas stap insaed. Sipos i no gat plante memba olsem oli kam long miting fastaem, bambae Palamen i save mekem narafala miting bakegen taem wan wik i pas finis, nao blong seken miting i gohed, sipos i gat tri memba blong Palamen, bambae tu i mas stap insaed, sipos i gat tri memba blong Palamen, bambae tu i mas stap insaed. Blong tok blong loa olsem i stanap long fas miting no long seken miting, plante memba bambae oli mas agri long hem. Blong tok ya i stanap, sipos i gat tri memba blong Palamen, bambae tu i mas agri long hem, sipos i gat tri memba blong Palamen, bambae tu i mas agri long hem.


OL BISNES WE I STAP LONG KOT


92. Ol bisnes we i stap long fes blong ol kot blong Nyuhebredis long dei bifo long dei ya we bambae Nuyhebredis i independen, nating we i bisnes blong man wetem man no i bisnes we polis i talem se man i brekem loa, long dei ya we Nuyhebredis bambae i kam independen, sipos Palamen i no mekem sam spesel loa, Hae Kot blong Ripablik blong Nyuhebredis bambae i talemaot fasin we ol bisnes ya bambae oli gohed gogo oli finis. Sipos Hae Kot i wantem givim spesel tok blong hem blong makem rod blong jajem blong samfala bisnes, bambae i save mekem olsem.


OL LOA WE I STAP FASTAEM, TAEM NYUHEBREDIS I NO INDEPENDEN YET


93. (1) Olgeta loa we tufala Residen Komisna i bin wok tugeta blong mekem, wetem olgeta loa mo rul we i kamaot biaen long olgeta, olgeta loa ya we oli stap stanap long dei bifo long dei ya we bambae Nyuhebredis i independen, long dei ya we Nyuhebredis bambae i kam independen, sipos Palamen i no mekem sam narafala loa blong jenisim olgeta, bambae oli stap stanap yet. Bambae olgeta oli gat paoa olsem we Palamen i mekem long fasin we Konstitusin ya i talem. Be ol man bambae oli tekem mining blong ol loa ya we i folem tingting blong Konstitusin ya, mo i stret gud long tok blong hem.


(2) Ol loa blong Inglan mo Franis we oli stap stanap long Nyuhebredis, oli gat paoa long dei bifo long dei ya we bambae Nyuhebredis i independen, long dei ya we bambae Nyuhebredis i kam independen, bambae oli stap stanap yet. Be sipos Palamen i mekem sam narafala loa blong jenisim olgeta, no Inglan no Franis i tekemaot ol loa ya, no i jenisim olgeta, no ol loa ya oli no save joen long ol loa blong Konstitusin ya, no long fasin we Nyuhebredis i stap wok long hem taem i independen, no long ol loa blong kastom, bambae oli no save stanap.


(3) Long dei ya we bambae Nyuhebredis i kam independen, ol loa blong kastom bambae oli stap stanap, bambae oli haf blong loa blong Ripablik blong Nyuhebredis.


OL BISNES BLONG OL KAONSEL BLONG DISTRIK WE OL MAN OLI MAS MEKEM FASTAEM, TAEM NYUHEBREDIS I NO INDEPENDEN YET


94. (1) Taem tufala gavman long Inglan mo Franis tufala i givgivim leta long tufala finis blong stanemap ol tok blong namba 94 ya blong Konstitusin, long nekis eleksen blong jusumaot ol memba blong Representatif Asembli, long sem dei nomo we ol man ples oli vot from ol memba ya, ol man ples long Distrik blong Tana bambae oli vot blong jusumaot ol man we bambae oli memba blong Kaonsel blong District blong Tana, mo ol man ples long Distrik blong Santo bambae oli vot blong jusumaot ol man we bambae oli memba blong Kaonsel blong Distrik blong Santo.


(2) Tufala gavman long Inglan mo Franis, bambae tufala i givgivim leta long tufala blong stanemap loa blong mekem rod blong tufala eleksen ya mo blong makem ol fasin blong mekem. Loa ya bambae i mekem rod blong ol kastom jif bambae oli gat ol memba blong olgeta long tufala Kaonsel blong Distrik ya.


(3) Taem ol man ples oli jusumaot ol memba blong Kaonsel blong Distrik blong Tana mo Kaonsel blong Distrik blong Santo, tufala Kaonsel ya bambae i statem toktok wetem Kampani blong ol Memba blong Representatif Asembli we oli Holem Gavman, blong mekem ol toktok we Asembli ya bambae i save agri long hem, blong mekem rod blong tufala Kaonsel ya i gat paoa, mo blong makem fasin blong tufala bambae i mekem wok blong tufala. Representatif Asembli ya bambae i agri long loa blong stanemap Kaonsel long Distrik blong Tana mo Kaonsel blong Distrik blong Santo fastaem, nao biaen bambae Nyuhebredis i save kam independent.


(4) Sipos Kaonsel blong ol Minista blong Representatif Asembli i wantem talemaot fastaem, taem Nyuhebredis i no independent yet, se bambae i gat eleksen long sam narafala distrik tub long jusumaot ol memba blong Kaonsel blong Distrik blong olgeta, bambae Kaonsel blong ol Minista ya i save mekem olsem. Fasin blong mekem eleksen olsem bambae i folem loa blong narafala eleksen ya we tufala gavman blong Inglan mo Franis bambae i stanemap, taem we tufala bambae i givgivim leta long tufala from.


OL SPESEL RUL


NAMBA WAN


FASIN BLONG JUSUMAOT PRESIDEN BLONG RIPABLIK


1. Sipos Presiden blong Ripablik i finis long wok blong hem, Komiti ya blong Jusumaot Presiden blong Ripablik bambae i mekem miting blong jusumaot jenis blong hem kwiktaem, we tri wik bambae i no pas yet.


2. (1) Komiti ya blong Jusumaot Presiden blong Ripablik bambae i mekem miting, mo bambae i mas gat plante memba i stap long miting ya blong wok i save gohed. Sipos i gat fo memba blong Komiti, bambae tri i mas stap long miting ya, sipos i gat fo memba blong Komiti, bambae tri i mas stap long miting ya.


(2) Be sipos i no gat plante memba blong Komiti long fas miting ya, bambae Komiti ya i save mekem miting bakegen taem we foteyeit haoa i pas finis. Mo long seken miting ya, sipos i gat tri memba blong Komiti, bambae tu i mas stap long miting. Nao sipos plante memba olsem oli stap, bambae oli save gohed blong jusumaot nyufala Presiden, olsem we Loa i talem.


(3) Taem ol memba ya oli vot blong jusumaot Presiden, plante memba i mas agri long wan man. Sipos i gat tri memba blong Komiti, bambae tu memba i mas agri, sipos i gat tri memba blong Komiti, bambae tu memba i mas agri, nao sipos plante memba i agri long wan man olsem, man ya bambae i stanap.


OL SPESEL RUL


NAMBA TU


FASIN BLONG JUSUMAOT PRAEMINISTA


1. Man we oltaem moa long stret haf blong ol memba blong Palamen oli stap agri long tok blong hem, man ya nao bambae oli jusumaot hem blong hem i kam Praeminista.


2. Sipos ol memba blong Palamen oli vot be oli no jusumaot wan man long fasin we paragraf antap i talem, bambae oli mekem narafala vot. Be man we i gat smol namba olgeta long vot we oli mekem fastaem, bambae oli tekemaot nem blong hem, taem oli mekem narafala vot ya.


3. Sipos long seken vot ya i no gat man i kasem namba olsem we paragraf 1 i talem, bambae oli stap vot bakegen. Be oltaem oli mas tekemaot nem blong man we i kasem smol namba olgeta long vot we oli jes mekem. Bambae oli mekem fasin ya gogo kasem we wan man i kasem namba ya we paragraf 1 i talem, no sipos no, i kasem we tu man nomo i stap, nao man we big haf blong ol memba oli vot from, hem i stanap.


DEKSONARI BLONG HEM


BUBU: 1. Ol fo stret bubu blong mi, hemia papa mo mama blong papa blong mi, mo papa mo mama blong mama blong mi. 2. Wan bubu blong mi, hemia wan papa no wan mama blong wan papa blong mi, no wan papa no wan mama blong wan mama blong mi. 3. Ol bubu blong mi bifo, hemia olgeta man mo woman bifo we ol bubu blong mi oli kamaot long olgeta. (Inglis; Grand-parent, ancestor. Franis; Granf-parent, ancestre.)


GAVMAN. Hemia i papa blong rulum kantri. Bifo, Inglan mo Franis, tufala i holem gavman long ples ya. 2. Hemia olgeta we oli holem paoa ya, oli stap rulum kantri. Bambae Gavman i pem ol man ya. 3. Hemia i man we i stap wok long nem blong olgeta we oli holem paoa ya. Tumora bambae gavman i kam. 4. Hemia i sotfala nem blong Kampani blong ol Memba blong Palamen we oli holem Gavman, we yu save luk nem ya long Deksonari ya. Gavman nomo i gat raet blong tekem toktok blong mane i kam long Palamen. (Inglis; Gowernmont, Franis; Gouvernement.)


GRUP: Hemia i kampani blong ol man we oli gat semkaen tingting long samfala poen blong politik, nao oli stap wok wanples. Samtaen grup i gat ol man blong moa long wan pati i stap long hem, mo samtaem pati i save seraot long ol grup. Grup ya i stap kam strong nao. Tok ya, fren blong hem KAMPANI. (Inglis; Group. Franis; Groupe.)


HAE KOT: Hemia Kot we i gat paoa moa, i bitim ol narafala kot blong Nyuhebredis. Samfala trabol bambae i go wantaem long Kot ya blong i jajem be plante trabol, bambae i go long narafala kot fastaem, nao sipos man i no glad long tok we narafala kot ya i talem blong jajem trabol blong hem, maet i save askem blong Hae Kot ya i jajem bakegen. Mo Hae Kot i gat ol narafala wok blong hem tu, olsem we Konstitusin ya i talem. (Inglis; Supreme Court. Franis; Cour Supreme.)


INDEPENDEN: Hemia i tok blong makem man no kampani no kantri we i no gat narafala i bos blong hem, hem nomo i bos long ol samting long laef blong hem. Kantri we i independen, hem nomo i stap stanemap gavman blong hem long fasin we hem wan i luk se i stret, (Inglis; Independent. Franis; Independent.)


JEA: Man we i gat jea long Palamen, hemia i wan tok blong mekem man we i memba blong Palamen, i gat raet blong toktok insaed long hem. Hem i jes kasem jea blong hem long las eleksen. (Inglis; Seat. Franis; Siege.)


JEMAN: Hemia i man we i holem jea long miting. Long komiti, oltaem Jeman i lida blong komiti, mo hem i stap lukaot long wok blong komiti blong i gohed. Long kaonsel, samtaem Presiden i jeman mo samtaem narafala man i save holem jea. Long Palamen, i gat wan man we Palamen i jusumaot olsem we Konstitusin ya i talem, mo hem i Jeman blong Palamen. Hem i holem jea long ol miting blong Palamen, mo i gat ol narafala wok blong hem tu, olsem we Konstitusin i talem. (Inglis; Chairman, Speaker. Franis, President.)


JIF JAJ: Hemia i lida blong ol Jaj long Hae Kot. Long Hae Kot, i gat fo jaj oli save wok long hem, Jif Jaj, wetem tri narafala Jaj blong Hae Kot. Fasin blong jusumaot Jif Jaj, mo blong putumap hem, tok blong him i stap long Konstitusin. (Inglis; Chief Justice. Franis; President de la Cour Supreme.)


KAMPANI BLONG OL MEMBA BLONG PALAMEN WE OLI HOLEM GAVMAN: Hemia i kampani blong ol memba blong Palamen we namba blong olgeta i bigfala moa, i winim ol narafala kampani wantaem, no i winim ol narafala kampani wanwan, nao hem i gat raet blong rulum kantri, long nem blong ol man ples we oli vot long eleksen. Long Kampani ya, maet oli blong wan pati nomo, no oli blong moa long wan pati. Kampani ya nomo i gat raet blong mekem ol loa long saed blong mane, mo i gat ol narafala raet tu olsem we Konstitusin i talem. Sotfala nem blong Kampani ya, Gavman. Taem Palamen i mekem miting, Gavman i talemaot ol plan blong hem blong mane blong nekis ya. (Inglis; Government. Franis; Gouvernement.)


KAMPANI BLONG OL MEMBA BLONG PALAMEN WE OLI OPOSISIN: Hemia i kampani blong ol memba blong Palamen we i stap agens long Kampani ya we i Holem Gavman. Namba blong olgeta i no bigfala olsem namba blong olgeta long Kampani ya we i Holem Gavman, be i moa big, i bitim ol narafala kampani, sipos i gat. Long Kampani ya, maet olgeta oli blong wan pati nomo, no maet oli blong moa long wan pati. Wok blong Kampani ya, oltaem ol memba blong hem oli stap tok agens long Kampani ya we i Holem Gavman, blong traem blong soemaot we hem i mekem i rong. Sotfala nem blong Kampani ya, Oposisin. Oposisin i sakem ol tok we i strong we i strong. (Inglis; Opposition. Franis; Opposition.)


KANDIDET: Hemia i tok blong makem man we i stanap long taem blong eleksen blong ol man oli save vot long hem. Sipos hem i kandidet long bigfala eleksen blong Palamen, nao i win long eleksen ya, biaen hem i kam memba. Mi mi no save vot long kandidet ya hem i narafala pati. (Inglis; Candidate. Franis; Candidat.)


KAONSEL: Hemia i wan kampani we ol man oli jusumaot ol memba blong hem blong; oli mekem samfala wok blong gavman long ples blong olgeta. Long Konstitusin ya, igat tok blong Kaonsel blong Olgeta Jif we ol jif oli jusumaot ol memba blong hem, mo ol Kaonsel blong Distrik, we ol man ples long ol distrik oli jusumaot ol memba blong him. Yumi nomo i jusumaot ol memba blong Kaonsel ya. (Inglis; Council. Franis; Conseil.)


KASTOMONA: Tok ya kastomona i go long graon nomo. Man we i kastomona blong wan graon, hemia man we long kastom blong ol man long ples we graon ya i stap, graon ya i blong hem, hem i gat raet long hem. Ol kastomona nomo oli gat raet blong tokbaot graon ya. (Inglis; Customary owner. Franis Proprietaire coutumier.)


KOMITI: Hemia i wan kampani we ol man oli jusumaot ol memba blong hem blong ol memba blong hem oli mekem wan wok long nem blong olgeta. Long Konstitusin ya i gat tok blong Komiti blong jusumaot Presiden blong Ripablik, mo Komiti blong Lukaot long ol Eleksen, mo Kamiti blong Laukaot long ol Man we oli stap Wok blong Gavman mo Komiti blong Lukaot long ol Wok blong ol Jaj, mo i gat tok blong ol Komiti blong Palamen we Palamen bambae i stanemap olgeta blong mekem ol wok blong hem. Wok ya i stap long han blong Komiti ya. (Inglis; Committee, Commission, College. Franis; Comission, College.)


KONSTITUSIN: Konstitusin blong wan samting, hemia ol strong tok blong mekem fasin we samting ya bambae i wok long hem. Konstitusin blong wan kantri, hemia ol loa blong mekem fasin we Gavman blong Kantri wetem ol man blong hem mo ol narafala man blong kantri ya oli joen blong mekem kantri ya i stap ron gud. (Inglis; Constitution. Franis; Constitution.)


MAN: 1. Hemia i tok blong man mo woman wantaem we i no makem wan saed long tufala ya. Olgeta man oli vot finis. 2. Hemia i tok blong man we i man, i no woman. Ol man oli kamtru fastaem, ol woman oli stap wokbaot biaen. (Inglis; Person, man. Franis; Personne, hommi.)


MAN PLES: Hemia i man we i gat raet long ples blong hem. Long velej, man toktok insaed long nakamal blong jif blong hem, mo long kantri, hem i stap blong hem, i gat raet blong vot long eleksen, mo i gat raet blong mekem ol Konstitusin ya i talem. (Inglis; Citizen. Franis; Citoyen.)


MINISTA: Hemia i wan memba blong Palamen, we Praeminista i putumap hem blong i lukaot long wan haf blong ol wok blong Gavman. Minista i stap wok aninit long Praeminista, mo i gat ol man long ofis blong hem, we oli stap mekem ol wok we hem i stap lukaot. (Inglis; Minister. Franis; Ministre.)


NETIF: 1. Netif blong wan kantri, hem i bon long kantri ya, long fasin we ol man long kantri ya oli luk se i stret long kastom, nao hem i gat raet long ples blong hem. Hem i bon long ples ya, be i no netif, papa blong hem i man afsaed. (Inglis; Native-born citizen. Franis; Citoyen indigene.)


OMBAJMAN : Hemia i wan man we Gavman i putum, we i waes gud long ol fasin blong loa, nao taem wan man ples i luk se wan man blong Gavman i mekem i no stret long hem, hem i save askem blong Ombajman i lukluk poen blong hem fastaem, blong faenemaot we poen ya blong hem i tru no i no tru. Long Konstitusin ya i gat ol tok blong makem fasin we Ombajman bambae i wok. (Inglis; Ombudsman. Franis; Mediateur.)


OPOSISIN: Hemia i sotfala nem blong Kampani blong ol Memba blong Palemen we oli Oposisin, we yu save luk nem ya long Deksonari ya. (Inglis, Opposition. Franis; Opposition.)


PALAMEN: Hemia i bigfala kaonsel we olgeta man ples oli vot long bigfala eleksen blong jusumaot ol memba blong hem. Long fasin ya, ol man ples oli givim paoa long Palamen blong mekem ol loa blong Nyuhebredis. Long nekis eleksen, bambae yumi jusumaot nyufala Palamen. Fasin we Palamen i folem long ol wok blong hem, tok blong hem i stap long Konstitusin. (Inglis; Parliament. Franis; Parlement.)


PATI: Pati, no pati blong politik, hemia i kampani blong ol man we oli kam wanples, oli stap wok wanples, from we oli gat sem tingting long plante poen blong politik. Fasin blong wok blong olgeta i bisnes blong olgeta nomo, be long taem blong eleksen, ol pati oli save stanemap ol kandidet blong olgeta, olsem we Konstitusin ya i talem. Mitufala i wan pati, mi mi no save vot long narafala man. (Inglis; Party. Franis; Parti.)


PRAEMINISTA: Hemia i man we i Hed blong Gavman. Praeminista, olgeta memba blong Palamen oli vot blong jusumaot hem, olsem we Konstitusin i talem, mo oltaem hem i lida blong Kampani blong ol Memba blong Palamen we oli Holem Gavman. Praeminista i stap jusumaot ol Minista, mo hem i olsem presiden blong Kaonsel blong ol Minista, we ol Minista oli wok aninit long han blong hem fastaem. Praeminista wetem ol Minista mo ol narafala memba blong Kampani ya we i Holem Gavman, oli gat paoa blong mekem ol loa. (Inglis; Prime Minister. Franis: Premier Ministre.)


PRESIDEN: 1. Presiden blong Ripablik blong Nyuhebredis, hemia i man we i Hed blong kantri ya blong yumi. Wok blong hem, hem i no man blong mekem loa, hem i lida, we i stap putumap ol haeman long wok blong olgeta, mo i stap lukluk ol wok blong Palamen, olsem we tok blong, Konstitusin i talem. Presiden blong Ripablik blong yumi, hem i wan man we yumi save tinghae long hem, yumi save ona long hem. 2. Hemia i hed blong kaonsel, we narafala nem blong hem jeman blong kaonsel. (IngIis; President. Franis; President.)


REFRENDOM: Hemia i fasin blong faenemaot tingting blong ol man ples long wan poen. Oltaem, olgeta man ples we oli gat raet blong vot long eleksen blong jusumaot ol memba blong Palamen, oli save vot long refrendam, be i no blong jusumaot man, i blong soemaot tingting blong olgeta, oli glad long wan tok we Gavman i talem, no oli no glad long hem. Blong jenisim samfala tok blong Konstitusin, ol man ples oli mas soemaot long refrendom fastaem, we oli wantem olsem. (IngIis; Referendum. Franis; Referendum.)


RIPABLIK: Hemia i kantri we paoa blong rulum kantri i no stap long wan man, i stap long olgeta man ples, nao olgeta ya oli stap jusumaot ol memba blong olgeta, mo long fasin ya oli stap givim paoa long ol memba ya blong oli rulum kantri. Konstitusin ya i talemaot we Nyuhebredis i Ripablik. (IngIis; Republic. Franis; Republique.)


PacLII: Copyright Policy | Disclaimers | Privacy Policy | Feedback
URL: http://www.paclii.org/vu/legis/num_act/kbrbv413